劇透影評｜《世外》探討死後世界　題材設定有趣

香港原創動畫《世外》上映後獲得唔少好評，入場後果然無令我失望，各方面都相當出色，估唔到港產片可以做到依種製作。未睇嘅要把握時間入場！
（以下有劇透）

「想哭趁這些未成憾事但願我陪著你喝光以後沉思」

故事建構出一個全新世界觀，講人死後嘅世外，再圍繞小鬼同小妹嘅關係而發展。題材唔算石破天驚，但設定幾有趣，又有啲新鮮感。敍事雖然唔係順序，但都唔算難明白。

「有些心思霎眼已隔空一輩子要再等到下次輪迴在世界」

小鬼同小妹純粹嘅情令人動容，由開初偶然嘅相遇，平凡嘅相處，一點一滴累積感情，甚至讓小鬼體驗到人間嘅悲傷。到轉世前小妹一步步走往瀑布，雖然腳步因為放低回憶嘅重量而變得輕快，但亦代表佢地嘅離別將至，非常沉重。

及後小鬼堅守一千年嘅約定，不惜一切都要守護小妹，肚餓同畫肚仔嘅伏線實在太感人。可惜佢地無法有一個圓滿結局，但至少一千後能再次相遇，好好道別。

兩次分別都相當揪心，原來無得再見一個人同唔捨得係如此難受，觀眾同樣分享到依份情緒，我都滴咗兩滴眼淚，餘韻極強。

「就算一世迷信跟你是還有自降生長期尋覓很難受」

其實係人都會犯錯，無錯可能導致嚴重嘅後果，但我地未必存心咁做，往往係受一時嘅情緒影響，甚至係迫不得已。唔代表我地係一個十惡不赦嘅壞人，有盡力補救過就好。

不過，要走出依份內疚並唔容易，嘗試同自己和解，放下仇恨同執念，先能夠逐步解開心結，繼續邁步向前。

「想知有幾多未完憾事但願你陪著我我想變做孩子」

《世外》動畫靚到無野好講，絕對係世界級，連細節位都描繪細緻，動作場面亦目不暇給。本身以為會有啲日本動畫影子，點知出到嚟感覺幾唔同，將依個獨特嘅世界同世外完美地呈現觀眾眼前，非常震撼。

配音喺上映前後引起咗唔少爭議，但我覺得幾唔錯，完全無影響我嘅觀影體驗，仲保留到廣東話配音嘅鬼馬傳神。我特別鐘意黑天依個角色，型得嚟帶點幽默感，張繼聰演繹適合不過。

「若有所思剎那已隔空一輩子要再等到下次沉淪在世界」

然而，電影確實稱唔上完美，特別喺故事編排上。前段鋪墊略嫌太長，如果早少少講出小鬼嘅身份，再加多幾幕佢默默為小妹做嘅事，相信情感可以推進得更深，所以我明白未必個個觀眾產生到共鳴。不過，我會話只係有啲美中不足，唔影響作品嘅優秀。

「大半生長期尋覓怎承受若你轉生忘我就唱這歌如初」

最後，香港出到咁出色嘅動畫，實在難能可貴，放到國際都絕對唔失禮，成功為港產片開創先河，更為今年沉寂嘅市場帶嚟一點新衝擊。希望未來有多啲香港動畫面世！

「Until we meet again Until we meet again Until we meet again」

娛樂