沈震軒重遇陳敏之　延續虐戀留缺陷美

歌手沈震軒為新歌而推出短劇系列，終圓網民訴求誠邀陳敏之現身，重現10年前的經典「使徒CP」組合「Kobe」及「Yan」，不少網民邊睇邊流淚更喊到劇終，可惜在短劇中兩人依然有緣冇份再添遺憾，不過「KY戀」的故事未完，皆因緣份將在廣州的「合體」音樂會中再續。

沈震軒（Sammy）重啟歌手旅程，更因新歌《最幸運的平凡人》而洐生出《車廂擺渡人》系列短劇，自資補貼、碌爆人情卡邀得歐陽震華（Bobby）、許靖韻、洪卓立、周家怡、關智斌、樂隊Mr.成員Ronny任嘉賓輪流登場，而最令網民驚喜的是陳敏之出現，故事正是經典劇《使徒行者》中，分別由他及敏之飾演的「Kobe」及「Yan」的延續篇。兩人在的士上重遇，加上《使》劇的片尾曲《越難越愛》為背景音樂，一幕幕「KY戀」的虐心回憶再被勾起，有網民留言：「點解10年之後仲要搞喊我？」該單元更成為短劇系列中Views數No.1，比Bobby的單元更受歡迎。

Sammy昨日接受專訪時，表示邀請敏之演出是應網民訴求，同時亦是圓其多年的心願：「當年已經好想有古仔可以延續，當送畀鍾意套劇同我哋角色嘅觀眾，呢次加咗新元素，想講畀大家知如果《使徒行者》時空真係出現，我哋會點呢？」談及「延續篇」中，兩人仍然未有好結果，但他卻覺得人生本是不完美，不認「殘忍」的他謂：「對我嚟話，呢個結果係好Sweet同非常之靚嘅Happy　Ending，我個人鍾意缺憾美。」

有指網民再次意難平，他則謂毋須失望，皆因集體回憶仍會繼續，宣布跟敏之將於8月15日假廣州舉行「平行時空音樂會」，他說：「個騷會再有新元素，我又有新歌推出，希望睇完我哋嘅古仔嘅再嚟睇音樂會度，最想喺由廣州開始，之後我哋可以返嚟麥花臣再開騷，總之一步一步嚟。」

至於敏之自言將「第一次」送給Sammy，她說：「我係未開過音樂會，心情都幾緊張，依家會練歌、練氣，但實際係點要開會再詳細傾吓先。（會試吓挑戰跳舞？）應該唔會啩，我跳舞咁得人驚，我諗可能會加入啲劇情。」她又讚Sammy能自編自導短劇很叻仔，所以音樂會要向他了解，自己則盡量配合。

東網網站 : https://on.cc/東網Facebook專頁 : https://www.facebook.com/onccnews/