張與辰分享愛情觀 曾受打擊唔敢拍拖 談跟已故爸爸關係

《中年好聲音3》亞軍張與辰日前接受由許文軒主持的《StarTalk》訪問，大談推出首支粵語單曲《深海》及舉行個人演唱會感受。

張與辰表示過去有太多不愉快愛情經歷，跟音樂團隊商討下，決定新歌以其愛情觀為主題，他說：「試過鍾意過一個人，大家關係好好，不過雙方都冇問清楚大家關係，未有同對方表白，但最終錯過咗，對方撞車意外離開，呢件事好大打擊，影響好深。之後嘗試踏出再拍拖，認識咗一個人，點知佢覺得要同我捱窮，就選擇離開。我會問自己冇錢就唔可以拍拖？令到自己對拍拖失信心同唔敢拍拖。

另外，爹哋、媽咪分開都有啲影響自己，令我對愛情唔渴望，怕畀人拒絕、嫌棄。呢首歌就係講我對愛情同深海一樣，都係唔敢接觸，因為細個試過浸親，我都好驚水。」

入行多年，張與辰音樂發展並不是太順利，他說：「真係因為《中年好聲音》令到多人認識自己，特別要多謝粉絲，令自己重拾信心。媽咪本身做駐場歌手唱歌，我3歲幾已經跟佢登台，覺得媽咪好靚，打扮好靚，唱歌好好聽，台下又有好多歡呼聲，細個企上台已經愛上咗舞台，立下決心一定要做歌星。

曾經喺馬來西亞同埋台灣發展未係好如意，自己入過谷底，都試過問屋企人攞錢，仲搞到有抑鬱，家姐有叫我唔好再做呢行。喺最唔如意嘅時候，曾經有一面之緣嘅創作歌手戴佩妮，佢知道我嘅狀况，主動透過傳媒搵我，叫我寫歌，佢不斷教我創作，真係要特別多謝佢，改變咗自己好多。」

談到跟已故爸爸關係時，張與辰說：「爸爸以前鍾意賭錢，令到爹哋媽咪分開，一開頭都有怪責爸爸，都好妒忌其他人有雙親照顧。早幾年爸爸在生時，去過醫院見面，同佢傾咗好耐偈，將自己心中多年唔舒服感受講出嚟，大家喊住講，佢都有同我講對唔住，留下咗唔好印象同麻煩畀屋企人，當其時心裏面已經放下，感覺輕鬆好多！」

（即時娛樂）