國產遊戲令張衛健孫悟空再度翻hit 年輕網民不知第二輯被叮走原因 與TVB逾20年恩怨情仇

1. 近日國產遊戲《 #黑神話悟空》熱爆全球，Steam 平台同時遊玩人數突破 240 萬，令歐美玩家紛翻查原作《西遊記》的歷史；在台灣方面，有電視台也搭上熱潮，在網上平台24小時馬拉松直播《齊天大聖孫悟空》，吸引千人同時觀看

2. 張衛健從影逾40年，多年來有不少代表作，如《小寶與康熙》、《少年張三豐》、至2018年的《大帥哥》等

3. 1984年因參加新秀歌唱大賽而入行嘅張衛健，1996年憑TVB劇《西遊記》飾演「孫悟空」一角紅遍中港台，更奪得當年TVB收視第一，創下高達44點收視紀錄

4. 經典對白如「Yo！ 駛乜驚！」、 「噼啪你個𠾐啲咚」、等皆成當年全港金句，係唔少8、90後嘅童年回憶；而近年「好X痛呀師父」仍被不少網民翻炒

5. 當年TVB順勢添食，開拍《西遊記（貳）》，但張衛健卻被叮走，有年輕網民近日開post，問及「點解當年TVB西遊記2變咗陳浩民 做?」，直言當時仍為新人的陳浩民，明顯不及張衛健，有心水清嘅網民「秒回」：「no budget」

6. 自稱與張衛健份屬好友嘅「細龜」黃一山就爆：「張衛健就話拍孫悟空好辛苦，問可唔可以加人工，當時同佢傾嘅就係TVB高層珍姐（曾勵珍），珍姐就話我哋TVB唔會加你人工，捧紅咗你，你已經得到你需要嘅嘢，加少少冇問題，但你嘅加價咁高，呢個要求我哋做唔到。」

7. 有指張衛健當時一集收入只有3000元，比《西遊記》另一主角江華收入差距約6倍，更傳出有高層直言「無毛你係唔值錢！」

8. 全盛時期TVB嘅氣焰，話雪就雪，遠自劉德華，至契仔李克勤（因四大問題）都冇情講，但 《西遊記（貳）》反應明顯不及第一輯，觀眾大彈陳浩民唔夠生動，「成碌木咁！」

9. 到1999年，張衛健參演嘅《少年英雄方世玉》喺兩岸三地颳起收視狂潮，當年香港版權由亞視購入，更成功擊敗TVB慣性收視。當年TVB進退失據，臨時將由鄭伊健主演嘅《雙面伊人》提前播出對撼，結果收視一下子由28點急插9點，成經典敗仗

10. 三年後，張衛健再喺2002年台灣拍《齊天大聖孫悟空》，令孫悟空一角再度翻hit，成當年台灣年度八點檔收視率冠軍。TVB不敢怠慢，立即購入版權，以平均34點收視順利稱霸全年收視冠軍

11. 至2018年張衛健重返TVB拍《大帥哥》，似乎亦對人工3,000耿耿於懷：「我人生入面，最辛苦最難捱的時間都是在TVB的日子。那時我剛入去，細佬又在加拿大讀書，未投身社會，我就每個月拎住3,000元人工去工作、去養我家人。不過，那種生活雖然辛苦，但都是我最義無反顧、最熱血的日子，今次回來就是想找回這種感覺。」

12. 時隔逾20年，以張衛健地位，當然唔怕得罪TVB，他亦指自爆解約事件，係接《大帥哥》嘅原因之一：「城中傳得沸騰騰說我會拍攝《西遊記》續集，但我很快宣佈同無綫不再續約，之後更離開香港，一直覺得像跟香港觀眾不辭而別。我心底常有句說話，我覺得欠了想聽我用廣東話演戲的香港觀眾一部電視劇」，並指接《大帥哥》，係報珍姐當年之恩

13. 近年張衛健台前工作明顯減少，他就自爆曾一年推了近三十部劇集，主要是近年經歷弟弟去世、母親一度遇溺，想留多啲時間陪家人、朋友，另一方面，是未有一些劇本可以打動到佢；而《西遊記》近年被重拍N次，自今仍無能人及

▼Follow 娛頭
Facebook: https://www.facebook.com/profile.php?id=61554772610166