俞琤驚喜現身戲院謝票　原來YT亡母是《虎毒不》出品人

《虎毒不》現正上映，電影上映第一個星期，主演談善言盧鎮業四出謝票，而昨晚星期五（25日）晚上，更有重量級嘉賓現身謝票，就是前商台高層俞琤（YT），更公開《虎毒不》「出品人」俞吳明玉，其實是她的亡母，已於2009年辭世，但YT希望支持《虎毒不》故事拍成電影，作為她對亡母的致敬。

俞琤驚喜現身戲院謝票，藉著電影抒發對亡母的感情，她說：「家母俞吳明玉喺2009年辭世，佢唔單止一位偉大嘅母親，佢仲係模範嘅媳婦，一百零一分嘅妻子，深受街坊讚頌嘅鄰居，喺果個仲未有外籍家傭嘅年代，佢獨力持家，照顧家姑丈夫同四個子女，任勞任怨。」

俞琤續說：「佢一生唯一嘅怨懟，就係喺晚年嘅時候，佢會同我講：『我好羨慕你可以有自己嘅事業同發揮，如果當年有機會嘅話，我諗我都會做出一番成績。』所以當我第一次接觸倒虎毒不嘅女主角嘅故事嘅時候，我即刻諗起家母，決定支持呢部電影，作為我對家母嘅致敬。」

俞琤提到，自己給予製作團隊絕對的創作自由：「唯一嘅要求係請佢哋拍一部好嘅電影。只盼電影可以誘發大家喺一啲議題上嘅關注思考同討論。多謝大家今日嚟睇之餘，我都想借大家嘅掌聲多謝我哋出色嘅演員：談善言、小野。呢個星期日金像奬會揭曉結果，我預祝佢哋馬到功成，雖然喺我心目中，你哋已經係贏咗㗎嘞。」說到最後，YT又特別提醒大家在今個周末，不如打個電話給父母，約父母一齊好好坐低飲餐茶。