蔡俊彥自詡聰明適合打花劍 家人朋友面前比賽最具意義

ViuTV全新節目《全運港將》下周一（11日）首播，主持李莉每集訪問不同項目的香港運動員代表，了解他們日常訓練和備戰第十五屆全國運動會近况，將於第一集現身的是連贏上海花劍大獎賽、亞洲錦標賽和世界錦標賽，登上世界排名第一的中國香港花劍運動員代表蔡俊彥（Ryan）。

Ryan說事前沒預計會在花劍大獎賽中獲獎：「呢一年狀態真係一直唔係幾好，本身已經將目標放咗喺之後嘅亞錦賽，亞錦賽得亞洲嘅運動員，相對會容易少少。已經將目標降低，所以冇諗過突然間攞得番冠軍。」比賽前一日，教練為鼓勵Ryan表示︰「只要打得好，我就將頭髮同鬍鬚染成粉紅色。」Ryan成功奪冠，教練亦兌現承諾。Ryan調皮地說：「粉紅色唔夠核突呀，應該要再Sharp啲囉！」

對於香港在第十五屆全國運動會中協辦劍擊項目，Ryan認為在主場比賽最大意義在於能夠在家人和朋友面前參賽。他說：「因為好多時我哋啲比賽都喺海外，咁屋企人同朋友都冇辦法現場親身支持到我，同埋喺現場見到其他支持者，可以同佢哋有互動。」早前在全運會測試賽中，Ryan坦言看見很多小朋友舉着「Ryan加油」的紙牌，他很開心，但同時亦令自己分心。Ryan表示：「因為每次打比賽入局之前其實要好嚴肅、好認真，但係當我係台上面見到啲紙牌，我就有少少忍唔住偷笑。不過，呢個測試賽就係畀一個機會我去適應呢啲現場氣氛，希望去到正式全運會嘅時候，我可以開心嘅同時亦好專心咁打到比賽。」

被問到自己有何優勢適合打花劍時，Ryan自信地回答：「聰明！」他覺得打花劍像下棋：「我哋成日要估對手每一個動作，如果要聰明咁打劍就係要喺適當嘅時候估中對手會做啲咩動作，我覺得我會贏到就係因為我成日估得中對方做啲咩動作。」Ryan直言與內地選手對戰極具挑戰性：「因為我自己嘅優勢可能係比較靈活，但係比我靈活嘅大有人在，全運會對我嚟講都係一個好大嘅挑戰，我希望呢段時間可以諗清楚自己對住內地選手可以發揮到啲乜嘢其他嘅優勢，可以藉住呢個機會更加進步。」

（即時娛樂）