13款韓國遊客真心推介的香港手信！竟然係呢幾樣 ？

香港人去韓國旅行最鍾意就係買化妝品、護膚品同襪仔做手信，間唔中仲會買下零食同泡菜畀自己返屋企慢慢嘆。咁你又知唔知韓國人嚟香港旅行最鍾意買咩呢？韓國資訊網站 Dingo Travel 就為大家介紹了 13 樣韓國人至欣賞、又平又抵嘅 香港手信 ，一同撐港貨！

撰文：GOtrip編輯部｜圖片來源：offical

1.口味多多 Lipton奶茶粉

韓國人好鍾意飲茶，山長水遠來到香港，當然要買定奶茶返屋企做存貨！Lipton奶茶粉有咁多隻味，一於買晒返去！

2.旅遊常備 保濟丸

細細粒，易入口又易買到，真係有唔舒服，遍地藥房都即刻搵到，識貨！

3.棚牙點都要夠靚 黑人全亮白竹炭深潔牙膏

韓國人飯前飯後都習慣刷牙，一日刷幾次，至緊要夠白夠靚。呢隻美白牙膏有效又大支，唔怪得要買定返韓國！

4.通鼻塞、暈浪都使得 和興白花油

有韓國遊客就話白花油好神奇，通鼻塞、暈浪都使得，仲話跌親塗完都精神番。

5.港式口味帶回家 大排檔奶茶

佢哋真係好鍾意飲茶，香港口味通通都鍾意，要買！

6.食都要食得夠可愛 Hello Kitty 杯麵

影相要可愛，著衫要可愛，韓國人連食都講究美觀可愛。Hello Kitty魚片嘅杯麵成為佢哋香港食物的可愛之選！

7. 空氣差？唔怕！曼秀雷敦爽鼻通

爽鼻通噴霧，香味清新又可以改善鼻敏感問題，係韓國遊客嘅真心推介。

8.用佢修護受損肌膚 Vitacreme B12 瑞士B12亮顏喚膚霜

缺乏維他命B12有機會易抑鬱又易貧血，既然吸收未必足夠，韓國旅客就鍾意買呢隻慢慢塗，又可以護膚，正。

9.暖暖胃、補補身 Ranong 薑茶

雖然係泰國出品，不過韓國人就鍾意來香港買，估唔到薑茶咁出名！

10.紓緩胃痛良藥 我可舒適Alka-Seltzer

出門最驚就係自己食錯嘢，傷咗個胃痛到冇晒心情！不過韓國人就唔怕，喺香港一沖我可舒適飲，好番晒。

11.揚名國際本土靚茶 明茶花飲

「明茶房」係100 %本地設計，除咗韓國人識之外，仲連美國奧斯卡獎都用過佢哋嘅靚茶招待，你又點可以唔支持？

12.沖奶茶必備 黑白淡奶

韓國網民欣賞黑白淡奶，原因係話將呢個奶落喺咖啡同奶茶入面，就可以即刻變成香港style ，喺屋企都感受到香港茶餐廳嘅味道。原來又係關茶餐廳事，難怪！

13.除咗辣味，公仔麵仲有好多隻味

喺韓國買包公仔麵，唔係辣味就係芝士辣味，難怪韓國人到港見到林林總總嘅出前一丁口味，都要大買特買！