娛圈單打︱不倫玉女想翻身　轉型慾女走唔甩

日本玉女永野芽郁，因為同已婚男星田中圭鬧出不倫戀，形象重創，代言廣告全部被撤，大河劇亦要辭演，搞到冇面見人，演藝事業一鋪清袋。之但係日媒透露，串流平台Netflix伸出橄欖枝，有意起用芽郁主演新劇，似乎死唔去喎。

嗱，據聞此劇將於今年內Roll機開拍，預計明年冬季至後年春季播出。由於串流平台只向用戶收費，唔使向廣告商交代，風險較小，加上芽郁演技有番咁上下，跟製作團隊關係良好，多一事不如少一事，有關方面傾向繼續起用佢做女主角。

即係咁，女明星最重要係形象，尤其芽郁走清純路線，雖然話佢打死唔認同田中圭有路啫，但觀眾並不賣帳。串流平台即使唔使睇廣告商面色，但拍劇始終需要大量投資，萬一播出後觀眾唔受，咁咪血本無歸？

再睇真啲，劇組對角色有所改動，芽郁不再飾演純情玉女，而係挑戰「魔性系」女性角色，藉此展現成熟演技及轉型喎。喂，唔怪之得啦，原來又係賣噱頭做自己！喂，呢招喺藝能界好使好用，過去屢有玉女明星因為爆出醜聞，惟有轉做「慾女」。好似澤尻英龍華被踢爆吸毒後，要露點拍電影，之前亦傳出Netflix搵佢拍劇，飾演淪為北韓間諜嘅高級妓女，有大量床戲。但傳還傳，劇集至今未見影，似係流料居多。

又好似偷食米芝蓮人夫大廚嘅廣末涼子，形象掃地後一樣有人搵佢出山，但竟然要佢同親生仔大演「母子丼」色情橋段，涼子深感受辱，一口拒絕，家陣仲患上情緒病入埋廠。唉，睇嚟芽郁想東山再起，真係要有轉型「慾女」嘅心理準備。

東網網站 : https://on.cc/東網Facebook專頁 : https://www.facebook.com/onccnews/