何佩瑜天生漂泊　撇「摯愛」返港發展

藝人何佩瑜近日由內地回流返港發展，隨即接拍新劇挑戰演技，飾演一名冷血媽媽。現實生活中愛心爆棚的她，暫時要與在內地收養的愛犬分隔兩地，大感無奈，計劃盡快辦妥手續，早日「一家團聚」。

何佩瑜（Jeana）5年前毅然結束香港的一切，返內地「尋根」，經過飄州過省工作及生活的日子，月前低調回流返港發展，並火速租了單位住及購入座駕代步。談到「再戰香港」，她笑指是命格使然，不能在同一地方久居，又說：「我好多朋友喺香港，返到嚟完全冇唔適應嘅感覺。（覺得過去5年好似嘥咗咁？）唔會喎，嗰段時間我經過咗徹底沉澱，覺得依家更加認識及了解自己！」

冷血人母考演技

她回港生活前已接演了港劇《重案解密》，與苗僑偉、張松枝及梁競徽等大演對手戲：「我負責其中一個單元嘅演出，要演一名冷血母親，佢嘅行徑完全顛覆咗正常人嘅三觀，接受演技挑戰之餘，今次台前幕後合作都好愉快。」她期待劇集盡快推出，看看成品效果如何。

Jeana去年在內地收養了愛犬「春天」，目前最令她擔心的，是「摯愛」暫未能來港相伴：「月中左右我會返去搞手續，坦白講，當初係朋友傳視頻畀我，話佢畀人綁喺舖頭門外，當時我見都冇見過佢，冇多作考慮就決定要照顧佢喇。我去接佢嗰時，啲眼淚不期然咁流出嚟，應該係緣分啩？」

她坦言相比一般被主人悉心照顧的家犬，「春天」性格較為踏實沉穩：「佢由江蘇嚟北京同我生活，我又帶過佢返鄉下東北，我哋成日揸車去唔同嘅地方遊歷。佢嘅眼神好似一刻都唔可以離開我咁，有時我要出遠門帶唔到佢一齊去，都會預先同佢講聲，等佢冇咁驚嘛，依家希望可以盡快團聚啦！」

東網網站 : https://on.cc/東網Facebook專頁 : https://www.facebook.com/onccnews/