港媽入迪士尼樂園賴低4歲女買午餐 長達45分鐘！放上網諷港人自私不幫手湊女 網民：你係咪痴線㗎？｜玩樂熱話

最近有港媽帶4歲女兒入香港迪士尼樂園，期間賴低女兒獨自去買午餐。有網民話港媽做法好危險，港媽則認為樂園應提供App落單服務，暗指員工應該主動幫手，並留言暗諷入園港人不主動幫手湊女，行為自己顧自己。

撰文：CC｜圖片來源：香港迪士尼樂園、Facebook群組「我真係好鍾意迪士尼資訊分享群」

港媽入迪士尼樂園賴低4歲女買午餐

上網斥港人自私不幫手湊女

香港迪士尼樂園臨近聖誕好多新節目，不少父母都計劃帶小朋友入園玩返餐。不過家長們帶小朋友入園絕對並不輕鬆。最近就有港媽在Facebook群組「我真係好鍾意迪士尼資訊分享群」內發文，分享自己帶4歲女兒入樂園的經歷，引起不少網民關注。

港媽分享指入園當日好多人，期間小朋友覺得肚子餓，就開始埋怨「肚餓肯定要搵嘢食，我已經揀咗間最少人嘅慧星（彗星），但都係爆棚。」期間有樂園員工提醒因為餐廳好爆場，要記得先搵位，港媽就決定搵好位後放低4歲女，放低電話供女兒消閒，隨後獨自一人前往櫃檯排隊買午餐，粗略估計約離開近45分鐘。

港媽表示自己當時緊張到「個心砰砰咁跳」，又稱「當我見到我囡時，嗰一刻我畢生難忘，佢冇玩電話，而係大大粒眼淚望住我！我唔敢想像當時佢係咩感受，佢當時內心肯定好驚好驚，點解媽咪咁耐都未返嚟……」，長篇表達內心愧疚，並「虛心建議」迪士尼樂園應該作出改善：「例如用app落單，或者有人送下餐呢？幫助下啲有需要嘅人」。

有網民留言同意港媽建議，認為迪士尼樂園應該學學海洋公園，設置外賣餐車方面入園遊客買飯，港媽回覆表示同意之餘，又稱「似我依種單拖嘅家長都好多，人多嘅時候，真係好無助」又指自己「當日冇咁幸運，遇到啲熱心嘅市民，個個都自己顧自己」疑似暗示其他入園遊客自私自利，不願意伸出援手幫手湊女。

亦有網民認為錯在港媽，認為港媽未有盡媽媽責任，將女兒放置在陌生人群中，「你哋食少餐唔會死，小朋友有咩意外就一世，唔好以為入咗迪士尼就肯定冇壞人/冇意外先得㗎」，並指就算認為樂園設施及安排不周，都不應該讓小朋友離開視線範圍。