海兒爆童年陰影被嘲似男人　自爆3次箍牙減肥無懼網民批評

「音樂女神」女高音海兒（Hedy），擔任《中年好聲音3》評審而為人熟悉，近日接受方健儀YouTube頻道訪問大談童年陰影及英國留學趣事，原來她小時候的聲音曾被嫌棄，連爸爸都笑她「唔講嘢就安全啲」，又大方回應被指網民對她身材及外貌的評頭品足。

Hedy指小時候對自己的聲音很自卑，更被親戚暗寸：「你唔講嘢就真係好斯文啦！」連爸爸都唔執輸，搞笑說：「你記住，唔講嘢就安全啲，一講嘢啲人就知你低能！」不過家姐天生靚聲，更被老師點名於合唱團中獨唱，令Hedy羨慕又妒忌，不過Hedy「不甘心」，媽咪讓家姐學聲樂，她一於死跟，結果發現自己唯一「天賦」就是夠大聲！「細個比賽唱classical，大聲係好着數，好似特別勁，之後開始攞啲獎。嗰份獎勵好有成功感、成就感。」

Hedy自三歲學琴，她直言是媽咪的「精心佈局」，被迫學琴，所以經常喊住練琴想放棄。「媽咪就話：『可以呀，咁我哋就揼咗部琴啦。』但係我又對部琴好有感情，好啦就練埋佢啦。學到演奏級、去埋比賽，最後就有一個鋼琴大賽，嗰陣時媽咪就話：『好啦，如果你贏咗呢個比賽，你就可以唔彈琴啦。』我嗰陣時就好努力、好努力去彈呢個比賽，然後贏咗呢個比賽之後，我就真係冇彈過琴啦。」

Hedy擔任《中年好聲音》評判後成為網民焦點，有人質疑她的實力，更多人討論她的身材，她大方回應：「我覺得每個人都有佢哋發言嘅空間。開始係有少少唔開心，但而家基本上都冇。而家我都會睇，因為有啲comment係有用，有反思嘅空間、進步空間。譬如啲人對我容貌上嘅一啲負面抨擊，好多人都覺得我靚咗好多，咁我贊成嘅，哈哈。」

Hedy續說：「講真我細個嘅時候見到啲明星我都有講過呢啲說話，哈哈，報應嚟嘅，哈哈。同埋我自己好清楚㗎嘛，譬如我箍牙箍咗三次，減肥我真係真心減肥，我真係減出嚟，呢件事係好刻意嘅，我唔係天生食唔肥，我食好多嘢，我以前可以食兩個公仔麵！」

講到理想對象，Hedy直言自己「慕強」，最緊要對方善良、有智慧：「我鍾意喺身邊人身上學嘢。」至於外貌？她笑稱以前男友類型各異，但出現了都會就嘗試一下，相當隨緣。