[耳機評測] JBL x UA True Wireless Flash 無線運動耳機
今次進行評測嘅運動產品係藍牙耳機，筆者我進行咗接近兩星期實測，包括運動時使用同埋生活上應用。
開箱
包裝盒幾靚仔，但依啲無關痛癢，即刻拆開逐一檢視配件，當然第一時間就拎件主角出嚟玩，充電盒外層用鋁金屬做，鋁特質就係輕，配以磨砂啞黑色，既前衛又高貴，出面其他牌子多數係用塑膠做，JBL已經先贏一仗，拉開充電盒，見到耳機真身，雞乸咁大隻 Under Armour 標誌，運動味湧哂出嚟，黑色底撞金色 logo 真係潮味十足，好啱d大隻仔口味，我見香港好多爆肌男舉野都係全身著 UA, 女仔依家都好興 keep fit，戴住嚟做運動，你生得唔似鬼妹我都認為你係 ABC……廢話唔再多講，其他配件有叉電線、兩對唔同 size 嘅耳骨托同矽膠耳塞，以及簡單說明書。
啓動操作及準備
都係果啲基本野，叉幾粒鐘頭電，然後戴上耳機，在手機上面開藍牙配對，配對後就用得，就係咁簡單，一副好嘅藍牙耳機就係要夠快同方便，唔好要我裝幾十個 Apps 去支援你一件工具，又要成日去更新先用到……
運動佩戴實測
最重要係測試跑步佩戴會否穩陣，會唔會戴戴吓跌出嚟，筆者响觀塘海濱測試，用原裝配置的耳托及耳塞 (M碼)，穩陣至極，強調多一次，唔係全程唔跌出嚟就代表穩陣，我係指整個跑步時間完全無輕微移位，可以心無旁騖去跑，唔駛跑1分鐘就需要摸吓隻耳，暫時係筆者試過咁多款無線耳機最滿意。 跑完30分鐘步，就順便做一些 work out，例如平板或深蹲之類，現時運動風氣盛行，開始多咗人走出健身室做運動，任何人隨意响公園放部手機响地下，開條 YouTube work out 流程節拍短片就可以跟住做 (多數配強勁音樂)，其實我就好欣賞，但我就唔太欣賞你開到大大聲，有時會影響到人嘅，依啲藍牙耳機就啱哂你，最後我測試埋跳躍動作，順利過關。
音質方面
筆者在跑步時測試聽歌，音質圓滑不粗糙，尤其低音效果特佳，如果你們喜歡聽節奏感強勁的音樂做運動，會係不二之選。(唔好同純聽音樂玩超靚聲果種有線耳筒去比較)
藍牙穩定性方面
筆者做過測試，在商業大厦中，將電話放低 (播緊戲)，走出單位外20米，推開防煙門走入後樓梯，這時筆者耳中播緊嘅復仇者電影聲音輕微斷了一下，走上樓梯聲音仍然清晰，直至我走到去上一層推開道防煙門行出兩步先斷，這表現响藍牙穩定性上已算有不俗嘅表現，測試藍牙距離後，順便响手機上面測試埋耳機睇片音質效果，班復仇者真係打到砰砰聲，睇片絕對無問題。睇片時，見到側邊友人同我講野，基本上外面世界我就乜都聽唔到，因為隔音實在太出色，但我响耳機左邊輕按一吓，就會自動調低主音調，聽到外界嘅環境聲音，依個模式叫 Talk Thru ~
接聽電話
叫側邊友人特登打電話俾我，好簡單，又係輕輕按耳機一下就接聽，我當然問吓佢我把聲响電話裡面夠唔夠磁聲，似唔似用緊藍牙 (但明明我就係响佢面前用緊)，佢話如果淨係把聲就真係聽唔出，但我把真人聲同佢電話裡面我把聲有極輕微 delay，但實屬正常。
其他地方測試
在多人的地鐵車廂中，卡與卡中間企咗幾個站聽音樂，隔音同藍牙穩定性表現上乘，無跳無斷，聽唔到斜對面個大媽講電話。
筆者感受
若以藍牙運動耳機來說，平心而論此 JBL 運動耳機内外出眾，可以挑剔嘅位不多，若硬要挑剔的話，就係筆者戴住嚟玩 PUBG 手機版時，聲音有少於半秒 delay，殺人無咁快。
評分
外觀: 9
聲音質量: 8.5
藍牙距離: 7.5
藍牙穩定性: 8
佩戴穩定性: 9
電量: 8
筆者總評
市場上性價比高的一款無線運動耳機，若要換耳機，不妨一試，必有驚喜。
更多:
Fitz Facebook專頁
[跑鞋評測] 穩健之選 Brooks Ravenna 10
[跑鞋評測] 肆意跳飛 Brooks Ricochet
[越野跑鞋] Salomon Ultra Pro 試後感
[跑鞋實測] Hoka One One 緩震跑鞋 Clifton 5
[試玩報告] ONE PIECE Summer Park
[越野跑鞋] 實測 Brooks Caldera2
官塘朝偉@Fitz
文章為作者意見，不代表Fitz立場。
歡迎投稿: https://fitz.hk/contribute/