由一趟初戀開始說起的補習天王｜FI SPOTLIGHT
*此欄由 Fortune Insight 主筆郭惠光撰寫
物理科補習老師洪俊偉 (Roy）行年二十九，月入十八萬。被問對這個數字是否滿意，Roy 竟然是一副對不起祖宗的表情：“我知我唔算好犀利，但我目標唔只係咁樣。”
我沒有深究面前這位凝皓教育新星到底是自卑還是謙虛，只是好奇：“物理不是語文，個個教嘅嘢一樣，你有什麼賣點？”
大型補習是亞洲特色行業之一，日本韓國皆盛，“補習天王” 在香港已超三十年歷史。經過歲月洗禮，行業猶在，但分隔三十載，補習天王的賣點有很大分別。
以前的天王賣 “成功”，現在的天王賣 “辛酸”。
三十年前如果去過現代教育補習的必定聽過 Ken & Roger 這個英文科組合，Roger 負責教英文，Ken 負責炫富。“學好啲英文咪可以好似我咁” 是 Ken Sir 的口頭禪，一邊說一邊除錶，除完便把錶放在投影器下面，是勞力士 Daytona。
要是今時今日的補習天王照著做，死硬，因為今日的學生和家長不是拿著同一把尺。今日的天王要賣辛酸、賣血淚、賣一個咬緊牙關發憤圖強的故事。家境有咁窮得咁窮，讀書有咁努力得咁努力，成績有咁好得咁好，這樣才夠勵志。
Roy 的故事有著非常低的 “勵志值”。
儘管當事人盡力嘗試隱藏，但言談間聽得出其成長環境是非一般富裕，而且深受家人愛護。“父母好錫我，但好多嘢都要我自己爭取，所以我都學識唔會隨便濫用佢哋嘅資源。” 言下之意，即是有資源可以濫用了。太幸福，勵志值減二十。
可能因為家境太好，而且父母從沒給予壓力，所以 Roy 於讀書時期的成績一直非常差，尤其是數學和物理科。有多差？中五學期末，數學科只有十分 (100 分滿分)，全班最差。物理科好一點，頭十名，不過由尾數上來。“驚唔驚？驚㗎，但自己都知道如果考得唔好，咪去英國讀囉。”太懶惰，而且太多後路選擇，勵志值減五十。
但過完一個暑假，就在這個距離 DSE 還有大約半年的存亡之秋，連老師都選擇把他徹底放棄的時候，Roy 開始發奮讀書，因爲在那個難以忘記的暑假，他遇到了他的人生轉捩點。
他戀愛了。
對方是名校香港真光女書院的同齡女生，而且是一名學霸。
常言道，戀愛就是學業的墳墓，所以當同學和家人都知道他好揀唔揀，就偏偏揀正 DSE 之前的一百天才學人拍拖，也已經對這位本身已經包尾的懶學生的前途打定輸數。誰不知奇蹟就在這個時候發生。
“佢 (當時女朋友) 成績好好，仲要唔係普通好嗰隻。可能我大男人主義，如果畀佢知道我同佢嘅距離其實差咁遠，我會覺得好醜。咁可以點？唯有努力讀書囉。”
就在這個 “唯有努力讀書” 的過程，Roy 發現了物理科尤其容易上手。“同其他科唔同，物理好多嘢都係非常簡單直接，就算想出啲 tricky 嘅題目都唔可以太花巧。”
結果 Roy 在 DSE 物理科成功摘星而回。短短一個學期，可以追到六個學期的内容，由不合格變摘星，原來戀愛不是學業的墳墓，這趟初戀總算為 Roy 帶來了一個奇跡。
之後他當然順利升讀大學，選擇了科大的土木工程。爲何不繼續讀物理？“想俾個安全網自己，起碼畢咗業之後唔知做啲咩都可以做工程師。” 幸好 Roy 之後在對的時間遇上錯的人。“有一年做，我上司就係一個土木工程師。我每日對住佢，就開始問自己，呢一樣係唔係我想要嘅嘢。” 果然是天生一個演説家，這麽懂得包裝自己的語言，兜一個圈去話自己上司勁唔掂。
“其實我一直都放唔低 Physics，由中學畢業開始，我年年都會再考一次 (DSE 的) Physics，六年都係五星星。” 順理成章地，Roy 最後選擇了做補習老師，更自己做埋老細。Roy 在太子開了自己的補習社，學生的進步立竿見影，這位補習界新星瞬間便聚集了一班信徒，補習社生意興隆。扣除所有成本，Roy 的收入很快便到達每月六位數。
“我真係會以為自己繼續發展自己嘅 centre (補習社)，但有一日林溢欣老師搵人聯絡我，話佢希望我可以加盟佢補習社。我諗都唔諗就應承，林老師係我一路以嚟嘅偶像，我嗰陣真係以為電話騙案。”
那句 “諗都唔諗” 一點也沒誇張，因為 Roy 是要自己貼錢過檔，原因是，他的補習中心還有很多個月才跟業主完約。過檔之後，他需要白白交租十個月。“我有信心搵得番。”
問他目標是什麼，Roy 希望自己的收入做到凝皓頭五位。十八萬一個月都唔係頭五位？“幾肯定唔係。”
當讀法律嘅越來越冇生意，每日朝九晚十二，當做牙醫嘅每日都要同大陸醫生劈價競爭，我就知道眼前呢個𡃁仔，淨係誓死做好教育呢一點選擇，已經係勵志值加番一百。
TEXT & INTERVIEW：郭惠光（Fortune Insight 主筆）
Edit： Chi
PHOTOGRAPHY：Steve Tam
Subscribe FORTUNE INSIGHT Telegram:
http://bit.ly/2M63TRO
Subscribe FORTUNE INSIGHT YouTube channel:
http://bit.ly/2FgJTen