笨蕉大劇院｜柯煒林患癌未能演出 林海峰嘆身體好最重要

林海峰、葛民輝、韋羅莎、柯煒林主演的50場舞台劇《笨蕉大劇院》昨晚（8日）正式公演。由於柯煒林（Will）身體抱恙，團隊和Will都希望能在最佳狀態下參與演出，故其角色暫改由演員余家溢替補。

《笨蕉大劇院》故事講述「保保戲班」正在大劇院上演30周年演出，戲班的靈魂人物保sir（葛民輝飾）和菲菲（韋羅莎飾）邀請了當紅小生Wilson（柯煒林／余家溢飾）前來坐陣，打算來一場「驚天地泣鬼神」的曬冷巨著，重振「保保戲班」聲威。不過，這場掙扎在藝術與娛樂之間的演出令台下一位保sir的忠實觀眾Nick（林海峰飾）看得不是味兒。Nick正經歷現實生活中的困難時刻，加上眼前不淪不類的表演，使他莫名氣憤，竟然持槍上台騎劫劇場。這位「專業觀眾」發號施令，指揮一齣他心目中的「好戲」。最終，保sir和阿Nick能否在這個真假難分的演出裏，滿足埋藏心底的慾望？

Coach張銘耀（German）及編劇李偉樂特別感激牽頭促成今次演出的俞琤（YT）。談及整個舞台劇的準備過程，林海峰感慨道：「其實呢個舞台劇都籌備咗接近一年，成個團隊都諗緊呢個劇本好唔好、收到劇本後又會諗啲對白寫得好唔好、我哋跟住導演同Acting Coach嘅指導又做得好唔好，同其他演員點配合會更加好？又或者我自己對劇本嘅理解，甚至待人接物方面做得好唔好？呢啲問題一路都纏繞咗12個月，直至有一日我發現所有嘢都唔係好重要，最緊要身體好。」

Will隨即驚喜現身舞台，跟觀眾打招呼及鞠躬致謝：「多謝你哋一直以嚟嘅關心同鼓勵，唔好意思，我呢個衰仔要令大家擔心。」當台下觀眾喊出「加油」，Will忍不住講笑：「呢個咪冇睇我啲Post囉，我都話唔要聽加油㗎，我要聽嘅係咩呀？1、2、3！」他一喊「USH」，台下即時回應：「我愛你！」氣氛溫馨感人。

Will續說：「我好榮幸，第一個參與嘅舞台劇就係同呢一班台前幕後嘅工作人員、同埋演員，一班咁正嘅人去合作，因為無論喺我發生咗啲小毛病之前定之後，佢哋都好照顧我，劇場真係一個好魔幻嘅地方。」他向觀眾承諾：「放心，我冇事。我會照顧好自己嘅身體，然之後再喺呢度表演畀大家睇。」全場報以熱烈掌聲。他再問觀眾：「你哋會等我㗎嘛？」聽到觀眾的熱情回應後，Will擺出大心心手勢致謝回禮。林海峰又鼓勵現場觀眾為Will送上祝福，觀眾即時大聲呼喊支持，Will攤開雙手接收觀眾窩心的祝福，如雷的歡呼聲令Will不禁掩面抹淚，演員們亦送上擁抱給予鼓勵。

最後，林海峰打趣說：「大家今晚睇完之後，如果覺得有咩做得唔好嘅，例如係我做得唔好嘅，隨便留言，但最尾一定要寫低一句：『要身體好』。」

（即時娛樂）