Ian自爆傷膝復發痛苦難當　對公司被指大細超有話兒

男團MIRROR成員陳卓賢（Ian）昨晚（8日）現身西九舉行爵士音樂會，獻唱多首中西靚歌，他透露平日也愛聽爵士樂，直言小酌怡情後聽爵士樂會更有Feel，笑言：「講嘢都慢啲！」Ian指平日慣常是觀眾坐台下，自己則站在台上獻唱，但今次卻調轉由他在台上坐着唱，觀眾則站在台下聽歌，感覺新鮮。

Ian騷後受訪，提到場內有粉絲大叫未夠喉，他笑指已多唱幾首Encore甚至清唱，覺得很好玩可以唱一些平日少機會在演唱會唱的歌，會考慮下次開騷加入類似環節，提到粉絲大呼開騷，他表示更希望先出碟：「因為有好多歌都未出，同埋如果要開騷都想先儲多啲歌，可以同之前嘅演唱會唔同有新嘅歌單，一直有同公司爭取。」他笑指手上的歌多得絕對夠出2隻碟，其望可早日成事出碟。

談到MIRROR剛推咗出新團歌《DNA is U》，MV預告宣傳片中卻將「MIRROR」串錯成「MIRRIOR」鬧出大笑話，Ian表示有留意事件，但自己負責唱歌跳舞，會專注好幕前演出的部分，又表示因舊患復發，拍MV期間膝蓋腫痛：「嗰日因為不停跳，就算唔使跳嗰陣都係要企喺度，成個膝頭腫晒，腫到落小腿同腳板，舊患加新傷，依家肌肉又弱咗，有時跳舞或自己運動嗰陣支撐唔夠又會令佢哋再傷。」他表示已找醫生診治，現時先做一些治療，現時已好了一些，現在先觀察一下，若醫生最終建議做手術也會接受意見，提到他稍後將參加閃避球活動，他笑指屆時「坐喺度打」。

談到有粉絲指MV中 12子並非人人有「大頭」鏡頭，不忿其偶像被忽略，炮轟「公司大細超」、「又搞分化」等，Ian坦言這個問題都講了很多年：「我哋都係唱好自己嘅部分，明白有時監製要分歌詞有佢嘅難處，每首歌有唔同長度，大家可以睇團隊跳舞，團隊一齊跳舞嘅畫面比較多。（你都好似冇大頭？）我冇乜所謂，我做好自己本分。」談到隊友姜濤失控過後浴火重生，現時變得佛系會看佛經減壓，問對方到有否與他分享？Ian笑謂：「我本身係天主教，所以我唔睇佛經，我睇聖經。（點減壓？）聽吓音樂，以前會做運動減壓，但依家傷咗做唔到。」

東網網站 : https://on.cc/東網Facebook專頁 : https://www.facebook.com/onccnews/