「友邦嘉年華」強勢回歸中環海濱　陪你跨越聖誕玩足成個冬天

等咗好耐嘅冬日盛事終於返嚟啦！「友邦嘉年華」今個冬天強勢回歸中環海濱，由2025年12月22日到2026年3月1日，陪你跨越聖誕、元旦同農曆新年，足足玩足成個冬天～❄️🎉

今年已經係第十一屆，主題好有意思叫做「香港經典」🎡，將我哋熟悉嘅本地文化同世界級娛樂體驗融合埋一齊，等大家一邊玩機動遊戲，一邊感受滿滿嘅香港情懷！

🎢 鍾意刺激嘅你，一定會好興奮～ 場內有超過30款機動遊戲同遊樂設施，由經典旋轉木馬到尖叫度爆燈嘅過山車應有盡有，無論係大朋友定細路仔，都可以搵到自己嘅心水玩意！仲有好多以香港標誌性元素設計嘅打卡位，記得拎定手機，影低開心時刻📸！

🤹‍♂️ 另一個必睇亮點，就係風靡全球嘅 Gandeys 雜技團載譽歸來，帶來全新「冬日世界雜技團」！今次有挑戰極限嘅「高空行者」，睇到人心跳加速；仲有極速刺激嘅「環球飛車」，真係驚險到拍爛手掌！個個表演者都技藝超群，保證令你睇到目瞪口呆，有個難忘嘅夜晚🌟。

🍢 玩到攰攰哋，點可以唔醫肚？場內有齊各式地道街頭小食，由魚蛋燒賣到雞蛋仔，風味十足，即刻幫你叉足電繼續玩！

🎵 嘉年華更邀請咗本地人氣音樂組合輪流獻上現場表演，聽住歌、吹住海風，個氣氛真係一流～ 無論係同另一半嚟浪漫吓，定係同成班朋友嚟瘋狂玩一晚，呢度都係今個冬天最好嘅聚腳點！👫❤️

友邦嘉年華
地點：中環龍和道9號中環海濱活動空間活動
日期：2025年12月22日至2026年3月1日
活動時間：高峰及普通時段：11:00-23:00；非高峰時段：12:00-22:00

▼Follow Outsider Magazine
Instagram: https://www.instagram.com/outsider.mgz/