應昌佑重返娛樂圈做主持　自認經驗淺：唱歌就拿手

許紹雄女兒許惠菁（Charmaine）上星期（2月9日）宣佈加入林盛斌（Bob）主理的棋人娛樂香港（Chessman），主力發展司儀工作。而曾經獲黎明賞識力捧、現年46歲的應昌佑（Charles）亦發文透露主動聯絡阿Bob，商討加盟棋人MC團隊的可能性，結果雙方一拍即合。應昌佑直言「唱歌我就梗係拿手啦，但講到做司儀，經驗係比較淺嘅，不過唔緊要，我一定會痛下苦工同好好磨練。」

應昌佑在帖文中寫道：「我應昌佑好耐冇同大家見面喇！自從結咗婚同生咗兩個小朋友之後，生活大多數都係圍繞住工作同埋家庭，睇住兩隻嘢都真係幾忙㗎，完全冇時間諗其它嘢。其實，我一直對唱歌都仲好有興趣，你見我間唔中喺架車度係咁唱就知啦。但其實我更想嘅係探索一下做司儀或者主持嘅呢一個路向，話曬我都係精通兩文三語嘅專才嘛。於是，我就膽粗粗聯絡咗Bob爺，傾下加盟棋人MC團隊嘅可能性，估唔到一拍即合，好快就達成合作，成功加盟呢一支咁優秀嘅團隊，對我嚟講絕對係一個不容錯失嘅大好機會，多謝Bob爺團隊上下嘅支持！」

應昌佑自認主持經驗淺：「講真，唱歌我就梗係拿手啦，但講到做司儀，經驗係比較淺嘅，不過唔緊要，我一定會痛下苦工同好好磨練，再加上有最佳男主持林盛斌嘅指導，雖然佢嘅英俊瀟灑高大威猛我就未必學得足，但佢帶動氣氛嘅能力同談吐技巧，我就一定會學到足！我將會化身成為一舊海綿，吸收曬佢同埋其他MC團隊成員嘅知識同伎倆，好好喺司儀呢方面發展。」

應昌佑希望大家今年可以見到一個全新的他：「2026年新嘅開始，希望大家能夠見到一個全新嘅我—全新嘅應昌佑！我將會加倍努力，期待喺不久嘅將來可以喺各大大小小嘅活動中，同大家見面！嚟緊馬年，同大家拜個早年先，祝大家新一年好似我個名咁，所有願望『應』聲而落、『昌』盛大紅、事事有保『佑』！」。

現年46歲的應昌佑，是70年代台灣「低音歌后」冉肖玲之子。2004年憑演唱電影《大城小事》插曲《我是否還愛妳》而被雷頌德發堀，後被黎明簽下成為旗下A Music歌手。應昌佑曾擔任衛蘭經典之作《大哥》MV的男主角，及後二人合唱歌曲《24》亦深受歡迎，但自2016年發表歌曲《過來人》後就淡出娛樂圈。