ViuTV《大叔的愛》高度還原日版 加長集數重現經典對白為電影版鋪路？
ViuTV的港版《大叔的愛》由最初決定開拍時網民嗌晒救命，到宣布由兩位「鏡仔」搭配黃德斌，即時引爆討論，成班鏡粉等到頸都長，劇集聽晚終於都出街，無論你有冇睇過原版《大叔的愛》，開播前都一齊睇咗以下重點先！
港版延長至15集
日劇版《大叔的愛》最初只是單元劇的其中一個短篇，後來因為大受討論獲拍成7集長篇劇集，爆笑BL情節大受歡迎，連帶成班演員都在亞洲人氣大爆發，ViuTV不只好眼光買入轉播，今年又翻拍成港版劇集播出，將劇中原本的日系元素改編成港味十足的情節和對白，更延長至15集，每集一個鐘，未來3個禮拜大家都可以睇得過癮！而且一眾角色會描述得更仔細，若果劇集播出大受歡迎，更大本錢跟足日本步伐，拍埋電影版，屆時更加勢不可擋。
香港首部BL劇集
雖然香港一直聲稱是結合中西文化的國際都市，不過在影視娛樂，特別電視台方面，可能因為缺乏競爭，多年來都冇乜進步，在性別議題上，更是大幅落後其他亞洲地區，所以今次ViuTV拍攝香港首部BL劇，就算唔係原創劇本，最少都係新嘗試，加上找來男團MIRROR成員Anson Lo和Edan擔正，相當破格，香港，終於有自己嘅BL劇集。
重現「巨根」經典對白？
翻拍得《大叔的愛》，當然唔少得重現劇中多個經典場面，單是至今公開的預告片，已數到有巴士攬攬、愛妻便當、錫錫額頭等爆笑又心動的情節，而討論度最高的莫過於凌少牧闖入浴室，當場向沖緊涼的田一雄告白一幕，未知壁咚半裸Edan的Anson Lo，會不會講出日版的「我知道前輩你愛巨乳，但巨根不行嗎？」呢……
「田田I love you~~~~~~~」
有睇過日劇版的觀眾都知，部長才是劇集的靈魂人物，而這個對田田痴心絕對的角色，今次由佬味幾十年如一的黃德斌演出，考慮到日版中的平象，未睇到他的表演已轟動，睇完預告更是搶晒fo，事關一直做開cool爆角色的黃德斌今次完全放低包袱，雖然冇kiss戲，但都有錫錫Edan面珠的情節，他的誇張表情和動作比起原版簡直有過之而無不及，預告片的一句「田田I love you~~~~~~~」更令人忍不住不斷replay，好想快啲睇啊！
今秋反攻日本
ViuTV今次正正式式向日本朝日電視台買版權翻拍，並非左填右補式抄功課，近日有日本傳媒報道，原來劇集播完之後，今年秋天就會在日本的影視串流平台TELASA、朝日自家電視動畫頻道和CS朝日電視台頻道播出，實行反攻日本，意味着可能嚟緊有機會帶埋MIRROR外銷，證明港產男團都可以衝出香港。