黃明德22歲生日　快餐店開生日會達成心願

英皇唱作歌手黃明德（Dark）日前迎來22歲生日，一班Fans特別於連鎖快餐店為他搞了一個「漢堡神偷」主題生日會，是Dark人生第一次於連鎖快餐店開生日會，玩到high爆。

Dark自爆其實十分渴望於連鎖快餐店開生日會，不過之後又怕醜地說：「未算係夢想，但一直都想試吓！之前有首歌叫《只想和你吃漢堡》，啲Fans覺得好代表到我，Fans Club就好好book咗呢度幫我搞生日會。」至於將主題定為「漢堡神偷」，他搞笑地說：「我首歌叫《只想和你吃漢堡》，佢哋就覺得漢堡神偷有『漢堡』呢兩個字，同埋可能佢哋覺得似我個樣啩，咁就揀咗做主題。」

生日會最搶鏡的，絕對係Fans精心準備嘅「說謊（雪芳）」蛋糕！原來Dark早前推出新歌《大鬧說謊城》，Fans就玩食字訂製一個雪芳蛋糕，上面有Dark的糖漿肖像及沙排裝飾，Details位滿分！他見到即時O晒嘴：「最難忘、最驚喜係收到Fans送畀我嘅蛋糕，首先個蛋糕好大嚿！同埋上面係有我個樣喺度，我個樣係一塊食得嘅糖漿牌，又有沙排，因為我最近打沙排。」切蛋糕時，他一口咬甩自己個頭，引來全場大笑。

生日會上，Dark跟Fans玩遊戲玩到癲，更豪言對連鎖快餐店的角色名瞭如指掌，他說:「以前只識『漢堡神偷』，依家連『小飛飛』、『滑嘟嘟』都記埋！」問到生日願望，Dark大吉利是得來又「超務實」：「希望我可以過到下一個生日，就已經非常之開心。」

東網網站 : https://on.cc/東網Facebook專頁 : https://www.facebook.com/onccnews/