柯煒林盼觀眾入戲院撐《觸電》：靠執著一步一步打上去

由林敏驄﹑柯煒林（Will）﹑陳穎欣﹑ANSONBEAN﹑羅莽﹑馮素波﹑盧慧敏﹑吳肇軒及羅浩銘等合演的電影《觸電》，已經上映逾12天，雖然口碑不俗，但票房未如理想。

Will今天（30日）在社交平台貼出多張電影照片，並有感而發寫道：「每套電影都有條命，《觸電》條命係唔服輸，係執著。喺threads見到句commment『好鍾意雜牌軍挑戰強者一步一步打返上去好熱血好簡單嘅感覺。』我都係，戲入面係，戲外都係。

一直以來，有得打波我就打，順境波我打，逆境波我打，總之有波我就打，落場後仲要玩得好投入。你話我戲入面邦少（Will角色）好執著咩？我戲外仲執著。每一次跌低，都係靠住呢份執著一步一步打返上去。一步一步，肯踩出嗰步就可以。

今次最正係成條team想打上去喎，台前幕後連埋觀眾都想打上去，成件事幾熱血幾正。每一個share過《觸電》叫朋友入場的觀眾，我都當佢係我戰友，幾浪漫幾中二幾觸電啊﹗﹗最重要係套戲真係好睇。

唔好同我講加油，同我講『我買咗飛睇觸電。』聽到呢句我會開心啲。

thanks che.manching，無你無呢段字。嚟，上映第三個星期，天地場又好，少啲場次又好，總之有場就可以一齊打上去。你入咗戲院睇《觸電》未？」

（即時娛樂）