懶人減肥法！1410斷食法 一個月減走5公斤！無須節食

女仔天生貪靚，每個人都希望可以擁有完美體型，唔少女士會想盡辦法減肥，從而獲得一個完美嘅身型。坊間有好多唔同嘅減肥方法，相信大家都眼花繚亂，唔知道應該嘗試邊一款減肥方法，早排好多人都會用「168斷食法」嚟減肥，但需要一日16小時禁食，只可以8小時內進食呢個方法，唔係好多人都可以做到。所以最近有營養師分享另一款減肥法「1410斷食法」，呢個方法會相對較容易進行，而且外國有模特兒試完，足足一個月就減走5公斤，成效極大，一齊睇下呢個減肥法係點做啦！

圖片來源：Youtube@Sanne Vloet、IG@sannevloet、Youtube@小日刀口、網絡圖片 ｜撰文︰Sharon

「1410斷食法」意思係每日斷食14小時，只可以喺10小時內進食，同「168斷食法」一樣，都係以時間限制為主嘅間歇性斷食法，藉此調整嚟配合身體嘅自然節律。呢個方法除咗可以減輕體重，仲可以控制血壓、膽固醇同提升睡眠質素等。

1410斷食法菜單建議

大家可以喺10小時內食自己想食嘅食物，並無任何限制，只要喺10小時內進食，之後就要斷食14小時。例如早上9點食完早餐，晚餐就需要喺晚上7點前食完，之後就唔可以再進食。建議上班族晚餐最遲要8點完成，斷食至第二日早上10點，10點後至晚上8點就係10小時進食時間。

斷食嘅14小時中，除咗水之外，可以飲無糖豆漿、低脂奶、茶類或者咖啡等飲品，避免食煎炸食物同甜品。最重要係斷食期間一定要飲足夠嘅水，每日最少補充2000毫升嘅水分。

一日菜單建議︰

早餐（11:00）：牛奶或無糖豆漿、澱粉（少量） 

下午茶（15:00）：水果、蛋白質食物（少量） 

晚餐（18:00）：正常用餐 

「1410斷食法」四大秘訣

1. 適量飲食

雖然10小時可以任食，但都要適可而止，唔好過量過量飲食，亦都唔建議喺可以進食嘅最後一個小時不停食。

2. 挑選合適食品

盡量選擇健康嘅食物食，如南瓜、番薯、粟米、蔬菜等。

3. 多飲水

每日最少補充2000毫升嘅水分。

4. 挑選合適嘅斷食時間

根據自己平時作息同進食嘅時間去進行1410斷食法。

外國模特兒Sanne Vloet正正用咗「1410斷食法」，喺短短嘅一個月時間減咗5公斤。佢喺Youtube分享因疫情關係少咗工作做，因為為焦慮而暴飲暴食，重咗5公斤，於是就用咗「1410斷食法」。呢段時間因為Sanne冇食早餐嘅習慣，所以通常中午12點先會食第一餐，晚上10點後就會開始14小時嘅斷食時間。Sanne大多會自己煮，因為出面嘅食物油分較重同比較鹹，自己煮就可以食得健康！除此之外，一個星期仲要抽5日，每日做30分鐘運動。一齊睇下Sanne一日三餐究竟會食啲咩啦！

早餐︰水果果昔、燕麥、乳酪為主

米餅搭配牛油果、芝麻同蛋；加一杯有香蕉、藍莓、高蛋白粉嘅杏仁奶果昔。

午餐︰墨西哥捲餅、沙律

墨西哥捲餅搭配生菜、牛油果、芝士同雞蛋；有時仲會整沙律食。

晚餐︰米粉、炒飯等

相比早餐同午餐，晚餐會食得更豐富，例如米粉湯、Pizza、咖哩、烤魚、炒飯等。

除咗飲食之外，亦以配合埋運動，Sanne每星期會抽5天做30至45分鐘嘅運動，包括深蹲跳、臀部訓練等，每日都會散步約15至30分鐘。

減肥方法未必人人都適合，最重要都係量力而為，均衡飲食同多做運動！