馬國明拍劇被女圍　羅子溢直認羨慕

視帝陳豪、馬國明、羅子溢、周嘉洛、劉穎鏇、陳懿德、曾展望及李芷晴等今日（14日）為全新節目《好嘢講多啲》宣傳，節目中眾人重演經典劇集角色，迷你劇模式呈現香港各項優勢。馬國明表示以往拍劇女拍擋不多，笑指今次總算獲得補償，感謝公司眷顧，今次跟劉穎鏇、陳懿德等以《衝上雲霄》和《飛常日誌》角色拍片，對白似曾相識，令他勾起不少拍劇回憶。另他透露即將為劇集《飛常日誌》續集開工，他說：「心情緊張又期待，上次去機場拍《飛常日誌》，踏足好多港人同旅客去唔到嘅地方，今次演機場管理層，會再有機會探索更多未去過嘅地方。」

相對少拍劇的陳懿德，直言今次能過足戲癮十分高興：「今次一嚟就已經可以拍住馬國明、劉穎鏇，兩套都係我好鍾意睇嘅劇集 仲要圓到我空姐夢！」她坦言恨拍劇，指今次角色對白比以往多，加上拍攝現場氣氛歡樂，覺得行高興：「係咁笑唔停，因為節目入面我、劉穎鏇同王嘉慧要做好鍾意馬國明嘅空姐，我係咁心心眼叫Captain Ma，搞到佢哋係咁笑，我癲喪一面可以喺劇入面釋放出嚟。」

另談到她於社交網透露因主持的選秀節目《聲秀》而感到壓力山大，她坦言以往做主有其他主持分擔互補，今次首挑大樑感覺責任極重，為此更不停參考以往同類節目的其他主持人如森美、車婉婉等的做法：「抄晒落筆記簿，真係每晚都攬住瞓，希望自己可以再做好啲，對得住呢個任務，陳懿德係一個唔容許自己淨係合格嘅人！有壓力係會令自己進步。」

羅子溢則羨慕馬國明跟多位靚女合作，搞笑指自己近幾年女拍擋不多：「可能之前去得太盡，但唔夠膽要求女拍擋，希望公司聽得明，哈哈！」他表示今次拍攝獲香港單車名將黃金寶做拍擋一起騎越野單車，也是新體驗，大讚對方為人親切，不時矯正他踩車姿態，又透露挑戰了很多高難度動作：「喺懸崖峭壁旁邊踩車衝落山坡，不過今次冇膽著貼身單車衫，覺得自己身型未準備好，只有單車短褲。」談到他近日不時放閃，早前就分享了跟太太楊茜堯拍拖食糖水照片，他解釋小朋友出世後比較懶惰，是時候搞點情趣逗太太開心。

李芷晴透露有份參與的《女神配對計劃》已經完成拍攝，問她與追求者「怕醜仔」Jacob有否繼續打網球？她坦言暫時未有機會。身旁的曾展望聞言即邀約她打波，當記者追問他與葉蒨文拍拖及同居傳聞時，他否認事件，坦言仍未到拍拖階段。談到二人日前被發現約會逛街，他解釋是獲廣告商贊助到店內揀眼鏡，直言二人關係好，私下會保持聯絡，亦不抗拒以情侶檔搵真銀賺。

東網網站 : https://on.cc/東網Facebook專頁 : https://www.facebook.com/onccnews/