李佳芯機械人上身扮自盡　失憶勁Cutie獲讚

無綫劇《麻雀樂團》12號晚播出一集，李佳芯（Ali）與譚俊彥（阿譚）在天台談心一幕，阿譚無端端扮鬼嚇Ali、嚇到Ali大叫兼笑住低吼揼腳，顯得Ali相當可愛；之後阿譚向Ali傾訴完後、着Ali保密時，Ali先是可愛地閉起雙眼、以手指扮槍指向頭、之後垂頭裝作中槍死亡，再以機械聲說出：「我已經delete晒

喇！」令不少網民勾起《智能愛人》的經典台辭：「如確定，請說確定」，難怪網民激讚Ali睇極唔厭：「Ali好得意，42歲都咁正。」

另Ali與阿譚夾手夾腳盤問謝東閔一幕亦相當搞笑，表面明明笑晒口兼客客氣氣，但配以鏡頭角度、陰森燈光以及同樣「入戲」的生果刀及蘋果，令整個場口有種搞笑又可怕的壓迫感，再加上謝東閔傻氣十足、兼嚇到嘴都震埋的搞笑演繹，相當Impressive！有《麻雀樂團》忠粉大讚Ali與譚仔相當合拍，更有網民指Ali是「萬能女主角」，無論Part邊位男藝人，都能令對方生色不少，相當厲害！網民：「緊張大師遇着賴皮阿叔，激都激死」、「好多位我都笑得出，兩個都演得好放」、「Shaun合作過好多女藝人，睇嚟Ali似係同佢最合拍」、「Ali真係好演員，拍陳豪好夾，今次拍譚仔一樣夾」。另有網民笑言Carry了鬍鬚Look的阿譚，望落竟有幾分林子祥影子。

東網網站 : https://on.cc/東網Facebook專頁 : https://www.facebook.com/onccnews/