FI專欄｜告別陳茂波？｜渾水

大家心照，陳茂波由 2017 年接任到而家，做咗財政司司長已經接近 9 年。

以香港高官嘅任期嚟講，佢絕對係「老臣子」。

2026 財政預算案仲有三個禮拜就出爐，坊間好多人覺得，如果呢份預算案真係好似佢網誌所講咁，成功將赤字轉盈、幫庫房止血，咁對佢嚟講確實係一個最靚嘅華麗轉身時機，功成身退。

呢排啲風聲吹得好勁，我結合各路聽返來的風聲，幫大家盤點一下預算案的可能方向。

第一：大家最關心嘅「派糖」，目前風向係：大撒幣式嘅消費券基本上死心㗎啦，但既然庫房轉好，政界而家全力谷緊「精準扶貧」同「中產減壓」。坊間吹緊，退稅上限應該會加碼，仲有，為咗谷生仔，「子女免稅額」同「外傭扣稅」呢啲民間呼聲最高嘅項目，今年入圍機會真係幾大，中產朋友仔可以期待吓。

第二：雖然財政好轉，但政府繼續慳錢。聽講公務員編制可能會縮減 2% 左右。最值得留意係「兩蚊乘車優惠」，雖然唔會取消，但「優化版」可能真係會出台，例如加個「每月上限」，或者強制要先收兩折，目的都係想細水長流。至於嗰個講咗好耐嘅「邊境建設費」，宜家政界仲係拗緊，如果真係落實，大家以後自駕北上可能要多畀幾舊水。

第三：「低空經濟」。宜家風向係大力谷「低空經濟」同「航天科技」，政府好大機會撥一筆錢去整無人機基建。當然啦，實際做唔做到，相信坊間有更多比我更專業的業界人士有想法。我唔係度講啦。

我始終係右派自由主義信徒。無論政府點樣死慳死抵，我認為最有效拯救香港經濟的方法，就係減稅。

我經常舉煙草稅做例子。幾年前，盧寵茂唔理業界反對，分別喺2023年和24年兩度大幅調高煙草稅，結果吸煙人口非但無顯著下降，反而非法私煙銷量激增超過兩倍，市場份額由7.4%飆升至36%，庫房不但無從煙草稅中受惠，反而令到私煙市場變得更加猖獗。

在經濟學的角度上，政府過度干預自由市場，就是會導致這樣的市場扭曲現象。

最近有個民間倡議組織107動力，就同《亞洲周刊》搞了一場「香港公共財政論壇」，我的好朋友徐家健教授，是論壇上其中一位講者。

他提出了很有趣的理論，叫做「港式鮑士民效應」。因為香港政府的過度管制，失去了需求定律的運用靈活性，最後令到公共財政失衡。陳茂波現在就是墮入了這樣的邏輯蟲洞之中。

老實講吖，財政預算案呢啲嘢，我哋仲有咩期望呀？不過傳聞波叔快將離任，今次作為臨別秋波嘅收官之作，就睇吓佢識唔識做，幫自己畫個完美句號。起碼做得好好睇睇，等大家留返個好印象啦。

Subscribe FORTUNE INSIGHT Telegram:
http://bit.ly/2M63TRO

Subscribe FORTUNE INSIGHT YouTube channel:
http://bit.ly/2FgJTen