BLACK PINK騷︱湯洛雯林盛斌朝聖變家庭活動　胡定欣唔識唱都要唱

韓國勁爆女團BLACK PINK第3次世界巡迴演唱會《DEADLINE》一連3晚假啟德體育園主場館舉行3場港騷，作為今次巡唱終點站，尋晚（25日）去到演出第2場，今次圈中人更係傾巢而出，出席藝人包括有湯洛雯、林盛斌、歐鎧淳、陳曉華、肥仔@ERROR、胡定欣、胡蓓蔚、倪樂琳、關嘉敏等，台上台下一樣星光熠熠。

當中多位artists都有拍vlog記錄呢個難得嘅moment，更將朝聖睇騷變家庭活動，好似湯洛雯佢就帶埋阿妹一齊入場，二人由未入場開始selfie到完騷，買晒現場先有嘅BLACK PINK粉紅加黑色杯裝特飲，出錢撐偶像；林盛斌雖然未有入場睇，不過佢就好豪氣咁買咗4張飛畀4位仔女入場睇，佢仲包辦埋買飛、揸車接送仔女出入，送完佢哋入場又要呆等4個幾粒鐘，加上兩個工人姐姐又放假，得番佢同我老婆喺屋企冇嘢做，非常搞笑。

至於視后胡定欣搵埋Bestie胡蓓蔚一齊睇騷，佢哋自爆唔識韓文，想跟住全場大合唱時就即刻唱錯晒，不過有心入場都已經好夠。同樣唔識韓文嘅關嘉敏，佢就拍埋片影住自己夾硬加入一齊唱嘅畫面，依然好想跟住唱跟住郁嘅佢，一時露出疑惑樣，一時就enjoy到反晒白眼咁，睇騷得嚟仲可以拍埋搞笑片，一舉兩得。

而歐鎧淳、陳曉華、倪樂琳等就扮靚靚入場，場外興奮狂影狂跳，又着粉紅或黑色衫示人，應援燈亦有準備充足，果然係100分嘅BLINK（BLACK PINK粉絲名）。

東網網站 : https://on.cc/東網Facebook專頁 : https://www.facebook.com/onccnews/