車公廟求籤｜解籤師傅也有「禁地」？　「為香港解籤都要小心啲，怕講錯嘢」

每逢大年初二，不少人都會到車公廟求靈籤。求籤容易解籤難，有解籤師傅表示，為香港解籤都要「小心一啲，怕講錯嘢」，被問到香港運程，師傅著記者不要問，「你問呢啲嘢，我點答你呀，分分鐘『唱衰香港』，所以唔講得笑架，只有『唱好香港』，香港越嚟越好、國家繁榮。」
攝影：劉貳龍、Nasha Chan

黃師傅說，一年最多生意的日子，是接近過年。

78 歲的黃師傅，20 年前受傷斷指，不欲言休，找師父學習風水命理，此後在車公廟外擺站，至今約 20 餘年。他每日都自行在車公廟設陣：架起雨傘、擺好桌子，為人「指點迷津」。他家住附近，到車公廟外解簽只求「有啲細藝做吓」。

今年解籤人流較少

黃師傅說，一年最多生意的日子，是接近過年。今年他如同往年，在車公廟外租了個棚位，兩萬多元投得 15 日，為人求籤。「年年都係價高者得；好似投地咁咋嘛，不過而依啲地就唔得啦，流標。」

他憶述，往時曾以 4000 元投得棚位，大歎棚位都貴了不少，只盼今年不會蝕錢。他認為自己的生意額與上年差不多，「你又唔好話唔好，話唔好又唔掂，呢啲屬於香港問題，經濟唔好，咁你點呀？」

何解師傅如此悲觀？皆因他認為，今年解籤整體人流較少，「有人北上、有部分人去外國、有部分人移民，老嘅又走咗（死咗），後生仔有部手機又未必會揾你，所以今年環境應該麻麻哋。」此外，近年拜車公的人有不少是菲律賓、泰國人，同時有內地人，「但佢未必走來嘛，佢哋連酒店都唔住」，拜車公的本地人，平日較少。

鄉議局主席劉業強在車公廟為香港求得第 15 籤中籤。

「話今年係好都係呃你嘅」

他續談到 2024 年運程，黃師傅沒加思索就說：「好似美斯請咗嚟唔落場，呃你嘅，所以話今年係好都係呃你嘅，總括來說都是麻麻哋；河國榮都燒炭，你諗吓香港咩環境？吓？」

「只有唱好香港，講國家安全、基本法一帶一路好⋯⋯」

然後黃師傅馬上補一句：「我講香港咩環境咋，我唔係話佢唔好呀，你千祈唔好搞錯，有咩事差佬會搵我㗎嘛，陣間話我講啲嘢，話香港唔好。」黃師傅歎，現時連解籤都要解得「小心」，「有咩事問你點講？只有唱好香港，講國家安全、基本法一帶一路好，只有講好啲，有咩問題就搵你。」

為港求籤、問車公香港運程本是常事，可是健談的黃師傅表示，香港運程屬政治，著記者「不要問」，僅回覆一句：「祖國好香港好。」黃師傅說有客人會問香港運程，但他們多數不回應：「你問呢啲嘢，我點答你呀，有咩事（客人）走出出面，分分鐘『唱衰香港』，所以唔講得笑架，只有『唱好香港』，香港越嚟越好、國家繁榮。」

他續說，「你唔好問呢啲問題，問呢啲問題好麻煩，到時話『有人訪問你，你講香港唔好』，咪死得？所以我唔答呢啲。」

「一關係到政治，我哋唔講」

如果記者、教師問到個人事業運，師傅又可否指點迷津？黃師傅說，個人運程都可以解，不過解籤內容就不含政治：「一關係到政治、大陸問題香港問題，我哋唔講。」

黃師傅解籤多年，見證著港人願望不變，「姻緣、事業、財運、健康」一直為港人所求「求來求去都是求呢啲，有咩好問？最緊要錢同健康，冇錢冇盛分分鐘（過世）⋯⋯」黃師傅沒有深刻的求籤人願望，他只認為。最重要是「有工做有飯食」，「講來講去都係香港好，國家好，國家穩定安全。」

「其他嗰啲唔好講呀，講出嚟唔好話你，我都唔掂。」

歡迎追蹤以下平台，即時接收《集誌社》最新資訊，及付費訂閱支持！

新聞