陳柏宇去學校睇囡囡表演全力應援 兩個奇怪舉動被老婆當眾叫停

除了唱歌就是湊女的陳柏宇（Jason），婚後一直安守住家男人本份，與太太符曉薇（Leanne）分工合作全天候照顧大女陳羿辰（Abigail）及細女陳星晴（Audrey）。熱愛家庭生活的Jason，不時開直播分享與囡囡生活點滴，由食早餐到陪Audrey上廁所poo poo都放上社交平台，無私跟粉絲分享。

為了讓女兒愉快學習，陳柏宇與Leanne放棄入讀傳統小學之路，在Abi就讀九龍塘香港創價幼稚園期間，已同步安排大女入讀加拿大國際學校（CDNIS），加拿大國際學校則為學生提供中小幼的「直通車式」教育，提供加拿大安大略省高中文憑（OSSD）及國際文憑IB課程，小學學費接近廿萬元起跳。

日前Leanne貼出大女Abigail在學校表演的影片，網民大讚Abi英語流利又淡定，但作為媽咪，Leanne表演當日最關注的竟然是席上的老公陳柏宇，皆因陳伯一如以往，每次欣賞囡囡表演都非常投入，媲美內地綜藝現場觀眾，全程又喊又笑。每次輪到Abi企C位，他就更肉緊為女兒大大力應援，跟住Abi唱歌仔，連對白都識一齊背，發揮「識唱一齊唱」的精神，成為台下MVP，一百分！

全力為囡囡應援，連老婆Leanne都忍不住發文表示：「我老公係一個非常感性之人，大家都知今日個囡學校表演，一去到已經開始大大力揮手，又想嘗試大叫，俾我極力阻止，佢話要個女知道佢喺度，然後個女知道佢喺度嘅時候，佢同我講佢要喊啦！我心諗陳生你又喊啲乜嘢啊？每次個女上台表演你真係咁感動，你要喊幾多年啊？」

自己開騷都未喊，睇Abi表演卻老淚縱橫。內心再興奮，在學校都應該注意聲浪，Leanne及時阻止柏宇大力揮手、大聲叫女兒名字，態度非常正確。網友對於陳伯可愛舉動，紛紛留言表示「到時兩個女嫁嗰時，應該要準備十打紙巾畀陳生，喊到豬頭」、「好可愛呀，真性情」、「我都會呀，睇住阿女上台已眼濕濕」、「巨蟹座係咁呀」、「爸爸起碼要喊到大學演出」。

真人版暖男爸爸陳柏宇，上月底因為細女Audrey發生家居意外，不慎跌倒撞傷頭部，需入醫院縫七針，在他們公開的WhatsApp語音對話中，Jason對向太太Leanne符曉薇泣不成聲，Leanne心痛道︰「唔好喊啦，爸爸，我知道呀，我都想喊呀，爸爸。我知道呀，加油呀爸爸。你好叻呀，如果你唔喺度，調返轉我可能仲驚，你好叻呀，爸爸﹗」

Leanne事後在IG代細女報平安︰「大家唔使擔心，柯住（Audrey）好勇敢，今日跌咗落地下撼親，個頭縫咗七針。雖然同爸爸分開嗰陣時喊到七彩，護士話縫到中段妹妹都已經冇喊，好乖咁俾醫生縫針。」照顧一對小朋友成長，開心、擔心的事天天都多，Jason注定淚腺大爆發，繼續又喊又笑地守護女兒成長。

圖片：IG@leannefu