Dee疑為醉酒「何男」爆醜事　喜獲11位女星相伴

一眾演員包括王丹妮、廖子妤、盧鎮業、何啟華（Dee）、楊偲泳、譚旻萱、李芯駖、林熙彤及謝君豪等，偕導演吳煒倫出席於9號晚舉行的賀歲片「《夜王》香港群星首映禮」，現場吸引逾百粉絲支持，Dee除在台上Rap歌曲《星秀傳說》大展歌技外，更獨得和跟11位女星影合照機會，艷福無邊。

Dee接受訪問時，被指有11位女星相伴，又被性感的芯駖及楊偲泳左右翹實，自肥成功，他沾沾自喜謂：「可能平時做得善事多，又食得素食多，所以個天都待我不薄。（心情緊張，有冇『硬』嘅感覺？）見我嘅甫士同姿勢，全部唔敢亂郁架，我真係『硬』住咗成個人，我真係完全唔知有呢個驚喜。」連一齊做訪問的楊偲泳也問他可有賄賂工作人員？他就笑說：「其實我好似將一個Bitcoin（比特幣）搣咗4份分畀工作人員。」楊偲泳則謂沒有收到，他繼續「吹水」說：「正常嘅，因為Bitcoin係睇唔到嘅。」

談及其ERROR隊友193在節目中大爆有位何姓朋友（何男）酒後瘀事，指「何男」在台灣夜店飲到微醉時，跟「何千金」爭埋單時，還爆句：「你係咪睇唔起我哋啲窮人呀？」令場面尷尬，結果被朋友拉走後，又問「何千金」可有Call車，因「何男」可載她一程，而「何男」酒醉後也自覺羞家，由於節目主持爆了一句「Dee！講埋啲咁嘅嘢」，疑暗示該何姓男子正是（阿Dee）。問到阿Dee是否「何男」時，自言收到很多詢問訊息的他說：「唔係我，佢姓何啫，唔代表係我，點解講到好似我咁，我覺得好奇怪。（但真係似係你喎？）件事真係似發生喺我身上，因為我都係喜劇人生，所以我拍咗一部電視劇叫《喜劇開場》，大家可以留意吓。」

問他可會醉後「斷片」忘記此事？他又謂雖然主角不一定是他，但亦為「何男」說兩句話：「可能『何男』飲醉，語氣就係咁：『喂，你係咪睇少我哋啲窮人埋唔到單呀？』。」被安排扮「何千金」的楊偲泳竟爆Seed謂:「呢句似你講。」他自顧自說：「193講嘢有孟加拉效應，我到依家都唔知邊個係『何男』，但可能佢都唔記得自己做過乜。（係咪你？）唔係啦，大把人姓何。（你斷咗片唔記得咗？）不如去查吓啦。（個個都諗起你喎？）我檢討吓點解大家會諗諗起我，我都希望『何男』都檢討吓唔好飲咁多酒，佢意思唔係咁，但以訛傳訛，人言可畏。」

問他可有爭埋單的習慣？他又說：「視乎咩人，我鍾意幫工作人員畀錢，因為多謝佢哋拍嘢嘅付出，我拍呢部戲都成日萬歲。（係咪對女仔疏爽啲？）疏爽冇分性別，視乎人哋係咪有錢過我，有錢過我梗係畀佢埋單啦，所以『何男』嘅行為我唔認同。」楊偲泳認同指阿Dee常請飲請食，不過全部是貼地食物：「腿蛋治、火腿通粉、蛋撻、菠蘿包，我哋都要求過龍蝦同生蠔，但佢話over budget，至今都未兌現到，有少少唔開心，但都感恩。」

可覺得193應公開「何男」是誰？阿Dee又覺得193毋須還他清白，怕愈描愈黑，任事件自然淡忘，不過亦有好處：「做人能夠埋到單代表有能力，有能力係應貢獻畀有需要嘅人。（可覺193多嘴？）正常呀，佢節目叫《亂講嘢》，佢都係秉承節目精神啫。」

楊偲泳表示除宣傳《夜王》外，另有新片將上映，問可叫視帝男友張振朗入場支持？她又耍太極：「我會叫全場人一齊入場睇，我希望所有人都有份睇，但唔知佢哋有冇飛。」

同場的謝君豪指戲中扮演經常會包場的大豪客，拍攝時被大班公關小姐包圍很開心：「心花怒放，因為8、90年代夜總會盛行嘅時，我啱啱畢業冇錢，又冇uncle、哥哥帶我去呢啲地方見識。」而今次他終可以大開眼界，因故事圍繞夜場，笑言自己「夜長夢多」，拍攝前要做資料搜集到夜總會作考察，還有專家從旁講解夜總會歷史，事後都有跟太太分享所見所聞，所以不擔心太太會呷醋。戲中他又跟廖子妤有感情線，笑言齊「跳老舞」:「華爾滋嗰啲」，還要上學舞堂。

廖子妤與王丹妮戲中演夜總會的「媽媽生」，拍攝前曾到夜總會跟在職的「媽媽生」取經。王丹妮表示聽「媽媽生」分享了很多趣事和辛酸，學習控制場面，應付難搞客人，但又要給客人賓至如歸的感覺，她說：「嗰個『媽媽生』好酒量，杯杯清，又教我哋點樣防醉，同埋保護啲舞小姐，聽到我哋個個都嘩嘩聲。」廖子妤補充指有位『媽媽生』年屆70歲，但外表很年青，聽她分享由50年代至今的職場經歷，大感驚喜：「佢講嘅內容超乎我哋嘅想像，又提及名人嘅秘聞，發現原來呢個世界係咁嘅，但係要有職業道德，聽完唔可以講。」

東網網站 : https://on.cc/東網Facebook專頁 : https://www.facebook.com/onccnews/