娛圈單打︱老娘速食嫩草　𡃁妹唔係嗰皮

魏如萱高調認愛21歲網紅Ian！（左圖：若盈）

呢啲係咪叫「瘦田冇人耕，耕開有人爭」呢？42歲嘅台灣金曲歌后魏如萱，忽然高調認愛小21歲網紅Ian，呢段年齡相差一個Double嘅「母子戀」，震驚當地娛樂圈。殊不知事情並不簡單，原來男方已有女友，同樣都係網紅，而且只有19歲卜卜脆兼身材火辣。兩女爭一男，Ian哥唔巴閉就假。

呢位19歲女友名叫若盈，喺魏如萱認愛後不甘示弱，揚言同Ian只係處於冷靜期，並無分手，暗示歌后「知三當三」。咁仲唔止，若盈疑夥同記者「擺拍」，約Ian再次見面，期間表現親暱，擺明勝利反擊。網民紛紛表示震驚，原本痛罵魏如萱老娘食嫩草、硬撬𡃁妹牆腳，家陣都唔知點轉彎。

好啦，情場如戰場，歌后係咪炒咗車，大家都好想知道答案。正當外界以為後生女最後勝利之際，結果出人意表。Ian深夜發出聲明，直言跟若盈已經結束情侶關係，歌后逆轉勝！

喂，橫睇掂睇，左睇右睇，呢位Ian都係普通後生仔一個啫，究竟有乜過人之處，搞到老老嫩嫩都為佢爭風呷醋呀？哈利，係愛呀！梗係愛啦，唔通錢咩！歌后雖然曾經離婚，仔都生埋，但勝在保養得宜，風韻猶存，小男生為之着迷有乜出奇。何況名氣大，出手闊，你話「母子」約會，使費點會唔係由「媽媽」全包！

即係咁，男人由8歲到80歲，一律鍾意青春漂亮女生，Ian哥都算異數。唔通女人真係如醇酒，年紀愈大，嗒落愈有味？嗱，歌后前夫、同樣係歌手嘅隆宸翰，對於前妻愛上大學生不欲多言。講到尾，原理同男人鍾意𡃁妹差唔多啫。