AK新戲演ANSONBEAN同性戀人 短髮新形象嚇壞隊友

江𤒹生（AK）、陳毅燊（ANSONBEAN）、梁雍婷、譚耀文及林宣妤等，今天（6日）出席邱禮濤執導電影《我們不是什麼》開鏡儀式。AK與ANSONBEAN將在《我》片飾演一對同性戀人，AK更為角色剪短頭髮。他說︰「剪完呢個髮型，代表我拋開偶包﹗自小學後未試過剪短頭髮，感覺好新鮮，但嚇親MIRROR隊友，問我個頭搞咩！」談到兩人可有親密戲，AK表示大家會在電影上畫時知道︰「導演一向拍嘅題材都大膽，相信搵得我哋演，一定會有考量。我希望可以演好呢套戲﹗接受男男咀戲？接得呢個工作，只要劇情合理就冇所謂。我都試過同女對手拍咀戲。男女、男男，我都唔怕，只係做劇本嘅角色。我慶幸有男男機會，因為人生冇幾可嘛！」

MIRROR昨晚演出音樂會跟偶像陳奕迅（Eason）同台，AK回憶時稱感覺夢幻︰「綵排時，Eason記得我哋每個成員嘅名。佢叫我時，我High到飛天，黐咗線﹗10幾年前，我第一次做演唱會舞蹈員，第一次見到佢，仲同佢影合照。噚晚再合照，我都有同佢分享，但時間太短，冇同佢講想合作。我哋個個輪流逐個同佢影合照，好不知廉恥咁阻住人。」談到姜濤墮海意外後首度演出，AK稱已當面慰問了他。至於做完手術後不久就如常登台跳唱的盧瀚霆（Anson Lo），AK說︰「大家都OK，冇人有事，MIRROR安全健康﹗」

ANSONBEAN表示開工前觀看了很多同類型電影，更應導演要求減磅操弗，應付或需要拍攝的裸露戲。他說︰「我做運動減肌同斷食，已由76公斤減至67公斤。作為演員，只要劇本合理都會照做。我接拍時，已拋開偶包。」談到5月時曾稱因心理健康和精神狀態問題而暫別娛樂圈，ANSONBEAN稱復出幕前代表已康復︰「我都冇諗過咁快同突然，沉澱完，諗通咗，覺得最緊要係我好鍾意表演，所以就算幾迷失都好，都想珍惜每個機會，做好每個角色。我冇特登去睇醫生，但有用精神健康程式幫手。女友（張天穎）主要都係支持、陪伴同鼓勵，好緊要，多謝。」

入行40年的導演邱禮濤坦言找投資者開戲從來不易，認為這次的「電影寒冬」並非最凍，稱翻版碟時代、金融風暴、科網股爆破、沙士時氣氛比現在更慘。首拍港產片的林宣妤被問到可想再拍無綫劇時，稱現在這個市道，什麼工作也想嘗試。談到早前與舞台劇演員男友劉俊堅公開合照放閃，她甜指兩人關係穩定，很開心。

（即時娛樂）