娛圈單打︱神秘老公唔現身　獨腳戲難以安心

是非多多嘅前港姐冠軍楊思琦迎來47歲生日，激罕帶同媽咪及一對仔女現身，為近期推出嘅新歌宣傳造勢。睇見思琦妹狀態大勇，講嘢有如開籠雀，明顯心情極靚，加上身材Fit爆，童顏依舊，橫睇掂睇、左睇右睇，都唔似即將「奔五」，不老基因羨煞旁人。

思琦妹侃侃而談，大講喺內地做直播帶貨嘅威水史，吹噓粉絲人數突破140萬，最高一次直播營業額達200萬人仔，因此冇需要收錢同粉絲私聊喎。澄清早前有關報道純屬流料，強調好鍾意同粉絲傾偈交流，不另收費。

席間又提到今次自資推出新歌，製作宣傳費達5位數字，稍後將於150個不同平台播放，威過威士忌。大女更即場攞起結他，為媽咪彈奏一曲，母慈女孝，好不溫馨。之但係，家人難得現身，奈何獨欠「神秘老公」，究竟思琦妹幾時先至帶呢位愛人出嚟見吓大家啫？

一講起「老公」，思琦妹總係兜晒大圈、遊晒花園。佢話喎，為免老公日常生活受影響，先至保護老公免被曝光；老公對佢嘅演藝工作非常支持，亦有讚佢唱歌好聽，大家總有一日會見到真身咁話。唉，都講到咁咯，太極耍完又耍，記者都好識做，唔再追問啦。

但正如口痕友話齋，因乜解究要搞到咁唔見得光啫？結婚唔係光明正大嘅開心事咩？此舉非但冇保護作用，反會招人話柄，遭人質疑講大話，又或者其實自己係小三，老公先至見光死。唉，都就快五張啦，思琦妹仲係好似腦囟未生埋咁款，唔係所愛非人，就係講啲匪夷所思嘅古仔。難怪喺香港難以立足，轉戰內地亦唔見得大紅。

東網網站 : https://on.cc/東網Facebook專頁 : https://www.facebook.com/onccnews/