港男Party飲酒醉被「執屍」 險失身畀中年女上司 全靠一平凡物件「虎口逃生」

飲醉酒畀人「執屍」，通常都發生喺女仔身上，但世事無絕對。有港男披露之前參加公司聖誕Party，飲醉酒後畀中年女上司「執返屋企」，貞操快將不保之際，想不到靠一件尋常不過的物件，令佢可以全身而退。

撰文：Yin｜圖片來源：TVB劇集《愛回家之開心速遞》劇照

這位港男近日投稿Facebook專頁「辦公室日報」披露這段聖誕「虎口逃生」經歷。話說事發在數年前，仲未有疫情，可以一大班人去卡拉OK開Party，發起人就係這位港男的中年女上司。

港男述憶女上司外型中性 年近50

先講講這位女上司，港男唔知道對方實際年齡，但估計她就算未到50歲，都起碼40幾，而且外型唔係美魔女，甚至一啲都唔女性化，短頭髮、平胸、更加有老鼠仔，亦有個中性嘅英文名: Jacky。

港男憶述，這次Party係Jacky一早話要搞，仲要喺平安夜搞，其實唔少同事都唔想參與，但要畀面上司，點都要露一露面。這份工係港男畢業後第一份工，亦都唔敢拒絕，仲全程玩骰盅，飲酒飲都醉晒。

港男醉酒落單 被女上司「執屍」

玩到後尾，同事都走晒，得返醉咗嘅港男，同上司Jacky。惡夢就開始，Jacky買單後喺港男耳邊，語帶挑逗咁講：「去我屋企。」仲要向佢耳仔吹氣。

港男初出茅廬，又飲到醉晒，模糊之際已經畀Jacky執咗上的士，直奔對方屋企，全程仲畀Jacky撳個頭去佢膊頭，猶如一對姐弟戀情侶。

「三十如狼，四十似虎」，Jacky將港男執到返屋企，完全唔浪費時間，立即嘴向港男，來個法式濕吻，條脷仲強行突破，伸入港男個嘴，甚至開始解開港男嘅恤衫鈕。

港男渾身發滾 意外逃離虎口

港男可能因為醉酒嘅關係，感覺渾身發滾，就推開Jacky問佢可唔可以開冷氣。猴擒嘅Jacky無理佢，港男於是見到地下有風扇，就行埋去開風扇。

Jacky之前被推開後，完全無洩氣，繼續從後攬住港男，伸手入恤衫瘋狂探索。港男憶述當時有諗過，「搞完女上司係咪會升職加人工？」可惜佢依個諗法最終無法實現。

港男嘔向風扇 女上司被反彈擊中

因為港男喺開風扇嘅同時，蘊釀多時嘅嘔吐物都向風扇噴射而出。於是，嘔吐物被扇葉打到全屋周圍飛，除了港男自己中返，仲中埋從後攬住港男嘅Jacky塊面。

港男望望Jacky，見到對方表情變晒，由猴擒變到一臉嫌棄。港男立即醒咗幾分，借啲依話要借廁所洗面，脫離最危險嘅時刻。

當港男出返廁所，Jacky已經變咗另一個人，蹲喺地下努力抹地，同港男講嘢都頭也不回。港男見狀就話走先，然後閂門離開，全程Jacky無再回應，亦無望過港男一眼。

經過今次「虎口逃生」，Jacky無再喺公司同港男講嘢，甚至打招呼。而幾個月後，港男都轉工走人了。