32歲譚嘉儀闊面消失 五官進化同62歲陳秀珠撞樣大方回應

近期成日見到佢，喺劇集《降魔的2.0》飾演洋娃娃精靈莉莉，又喺《殺手》飾演專責清潔現場處理屍體嘅清道夫沝淼淼，講緊嘅係2011年憑《超級巨聲3》奪得季軍入行、憑《愛．回家》拍住木偶哥林師傑飾演木偶妹而嶄露頭角嘅譚嘉儀，入行十年又唱歌又拍劇，角色仲愈嚟愈吃重，演藝發展係同輩巨聲幫當中已經算係好好成績。

撰文、圖片：東方新地

譚嘉儀闊面消失 IG狂派三點式水著福利

愈多曝光、愈係入屋、愈多機會，又真係應驗咗嗰句名言：人係會愈紅愈靚㗎！當年出道外形唔多起眼，木偶妹時期又有啲baby fat包包面，譚嘉儀近年人氣遞升逐漸上位，面貌五官亦隨之而愈見精緻。以前包到實一實、金毛藍眼影嘅MK特色都慢慢搣甩咗，家陣32歲嘅譚嘉儀個人IG最多就係化行妝靚樣新相，仲有大量三點式水著狂派福利，令人涼浸浸解吓暑㖭，真係自信心都返晒嚟！

五官進化同62歲陳秀珠撞樣 大方回應：秀珠姐靚好多！

不過咁，愈靚愈行妝當事人自我感覺良好，但旁觀者清，有唔少網民話譚嘉儀近年五官進化，個樣愈嚟愈似奶奶級藝人陳秀珠，直頭撞晒樣咁滯！ 32歲女被人話同62歲前輩撞樣，如果譚嘉儀真係唱到61歲，你估以呢個進化速度，到時佢會蛻變到咩新版本呢？

俾網民熱烈討論同陳秀珠撞樣，譚嘉儀就大方喺IG Story回應：「多謝大家，秀珠姐靚好多啊 希望將來有機會影返張合照啦」 大方回應得到一眾網民支持。