不為打卡的藝人跑者：陳山聰：「我只是一直在跑步。」

跑步對陳山聰（Joel）來說，早已不是一時興起的潮流，而是一種習慣、一段歷程。早在香港的 running boom 未興起、明星和 KOL 們紛紛「著鞋開跑」之前，他已經默默地跑了很多年。

不是為了打卡，不是為了贊助，更不是為了潮流，而是因為單純的堅持。

他的 PB 成績如下：
• 全馬拉松：3:37（2017 年東京馬拉松）
• 半馬拉松：1:45（2024 年澳門銀河半馬）

跑步，是減肥開始的旅程

「差不多二十年前開始跑步，最初其實係為咗減肥。那時候做藝人，身形當然要控制。」山聰回憶說，「當時喺九龍灣運動場附近認識咗一班跑友，有『巴士之友』、樂華啲朋友，一開始咩都唔識，跑鞋跑錶都唔專業，純粹係一齊玩。」

那段時間，他第一次參加了渣打馬拉松 10K，比賽之後卻因工作忙碌停跑多年。直到十n多年前，山聰因為穿不下一條喜歡的褲，決心再減肥：「每日五點起身去寶雲道跑步，跑跑下又再上癮，後來去咗澳門跑銀河半馬，嗰次就做出我而家嘅半馬 PB。」

之後更順勢挑戰初馬：「冇教練、冇訓練、冇贊助，前一晚聽人講要食多啲飯，點知食太多搞到中段肚痛，最後完成時間大概4 小時15 分左右！」

靠自己跑出成績，也跑出信念

山聰說，跑完初馬後，開始認真想學跑步。「當時成日喺 TVB 拍戲撞到蔣志光哥，佢教咗我好多嘢，包括要慢跑、跑山、練斜路；唔好急，配速九分鐘都可以。之後我每星期跑三次，由九龍灣跑上飛鵝山，經郵輪碼頭返轉頭。」

經過這樣的調整，他下一年就成功sub 4，「係渣馬做咗3:45，仲收到一張『進步獎狀』。」他笑說，「其實我冇跑會、冇教練，只係開始明白跑步係乜。再加上睇咗關家良一本書，最記得一句：『心沒有放棄，身體就會跟隨』。」

跑步改變了我

跑步，對山聰最大改變，是性格與思維：「以前比較負面，而家真係正能量咗好多。馬拉松，當然報個名就得，但要堅持日日訓練，大風落雨都要跑，連打八號風球我都試過落街跑。」

這份堅持，也影響了他的圈中朋友，組成了明星跑團「Crazy Runner」。「當藝人，生活唔穩定，要跑步真係好多藉口，開工 0600、收 2700（即 03:00am），但我就堅持落去，希望做個榜樣。」

「堅持」這個字，我會一直教落去

「跑步成為我生活中很重要一部分。」山聰說得堅定。「每日重複同一件事，就係一種堅持。做人都一樣，堅持未必成功，但唔堅持，一定唔會成功。」

這份信念，他也灌輸給兒子：「我成日話俾佢知，唔好半途而廢，玩都要玩得有始有終。」

唔為比賽，只為自己跑

「我冇打算跟教練，唔係因為唔尊重專業，而係我想自由咁跑。跑步對我嚟講唔係比賽，係享受。我唔追成績，只係想贏自己。」

雖然如此，他也樂於與專業跑手交流。「最近經常同Jordan（Saucony Run Club 跑步班教練）跑步，佢係專業教練，有咩問題我都會問佢，佢亦都好樂意分享。」

跑步，是一種生活態度

「跑步好簡單，落街就可以起步。唔使等人，唔使預約，自己控制節奏。打波要約人，羽毛球要等場，跑步就最方便。」

而山聰最鍾意的跑步地點，是西貢東壩：「一邊跑一邊望住海，真係心曠神怡。而經常跑嘅地方就係西環到灣仔，望住維港，最靚。」

走到世界都要跑步

「出 trip，我一定帶埋跑鞋。」山聰數過他曾經在世界各地跑步的回憶：「溫哥華、巴黎、倫敦、澳洲、馬六甲、南非、甚至北京零下幾度都有跑過。」

他說，跑步讓他以另一個方式感受城市。「好多時跑過嘅地方，行街唔會行到，搭車又睇唔到。仲試過跑經間舖頭，覺得有趣，跑完再入去行。」

Crazy Runner 是一種精神

「當初係袁偉豪（Ben）見我成日 post 跑步相，就約埋胡諾言、Ben、豹嫂（胡蓓蔚）一齊跑，住同一個屋苑就更加方便。」本來叫「喪跑兵團」，但改做「Crazy Runner」之後感覺正面得多。

「雖然而家唔一定成班一齊跑，但精神仍在。定欣鍾意打網球，Ben 間中會出現，胡諾言係鐵腳。」山聰說，運動形式唔重要，「最緊要係影響身邊人一齊做運動，散發正能量。」

兒子會唔會成為跑手？

「佢而家間中會同我去公園跑步，跑姿都唔錯。自己主動要求買跑鞋，都話想試參加跑會學跑步。我唔會逼佢，但會支持佢鍾意做嘅事。」

現時他正在學跆拳道、籃球、打鼓。「其實每樣都唔係花太多時間，主要係想佢少啲睇電視，唔係做虎爸虎媽。俾佢試多啲，搵到最鍾意嗰樣就得。」

跑鞋唔使貴，穿得好睇最重要

雖然山聰平時形象一向以「著得」見稱，但對跑步裝備反而唔太執着：「有贊助，就着佢哋俾嘅。發哥都講過，鞋買貴咗，會飛咩？」

他笑說，跑步 fashion 好靚，現在好多跑鞋設計靚又襯衫，「想有型都應該跑步啦！」

唱歌唔使特訓，因為一直有跑步

「近年多咗做演唱會，其實唔使特別練氣，因為我一直有運動。」他說，即使是COVID 期間，都堅持每日跑10K，「住深井時我每日都落街跑。」

下個目標？神戶馬拉松！

「如果時間許可，我想去跑神戶馬拉松。因為除咗跑步，我另一個目標係 – 食好嘢，哈哈！跑完馬拉松再食拉麵、燒肉，真係冇得頂。」

山聰的建議：人生一度，試一次就知

「跑步現時已經係一種生活風格，想追潮流都應該要跑下。你以為會悶，但跑過一次，就會知有幾爽！」

Please follow Insports Hub on Facebook & Instagram
https://insportslab.com/
FB
https://www.facebook.com/insportslab
IG
https://www.instagram.com/insportslab/