方力申罕談太太Maple過去獲父母支持接納 感覺如釋重負

方力申今年情人節宣布已跟拍拖兩年的葉萱（Maple）結婚，父親節時再報喜將升呢做爸爸。他近日接受查小欣網上節目訪問，分享求婚結婚當天一氣呵成的難忘回憶，並罕談父母對女友過去的包容。

方力申坦言已年過40，與Maple相處融洽，又希望父母能早日享受兒孫之樂，當機會出現時，就要毫不猶豫把握。他說：「剛好要去拉斯維加斯工作，註冊結婚好方便。媽媽提議乾脆結婚，我就開始籌備。有位好朋友幫我安排一系列驚喜，包括租飛機並掛上『Will You Marry Me』字句。大家以為好貴，其實只係5位數，慶祝生日時都可以考慮玩吓！」雖然求婚計劃萬事俱備，過程卻接連出現蝦碌情况。方力申憶述：「第一個笑話係飛機遲到45分鐘，我喺海灘不停拖時間，終於捱到飛機出現就求婚。換衫時，證婚人突然現身，即場註冊，求婚加結婚一次過完成！」

求婚講求驚喜，方力申透露事前差點被媽媽「穿煲」：「太太臨時臨急話唔去拉斯維加斯，我阿媽就打開口牌：『你去啦，佢可能會同你求婚！』跟住太太問我，我話冇可能，一定唔會！當離開拉斯維加斯，佢就覺得唔會，因為大家以為拉斯維加斯最容易結婚，但原來洛杉磯都得，佢以為冇咗呢件事，去到真係求婚嗰一刻，佢都愕然，再結婚簽字就更加愕然！」結婚當日，方力申身穿粉紅色西裝，正是去年到英國觀看溫布頓男單決賽與湯告魯斯合照時所穿的一套，太太的婚紗更是由他親自上網訂購。他說︰「我都幾叻，我太太嗰兩套婚紗都係我上網訂，佢係模特兒身形，一著就弗﹗」

方力申表示太太Maple除了外在條件，內在美更是與眾不同。他說：「佢好唔同，去歐洲旅行返嚟乜都冇買，唔太需要物質享受，食嘢又貼地，同我一樣生活簡單，佢天真樂觀嘅性格亦好吸引我。」談到早年Maple勇敢發聲揭露邪教事件，方力申表示拍拖一段時間後才向父母交代，反應出乎意料地支持。他說：「我媽咪好支持佢，可能大家都係白羊座，敢愛敢恨，覺得做得啱、需要發聲就應該講。當時我拍低咗畫面，媽咪攬住佢講：『無論你將來同我個仔得定唔得，我都當你係我個女！』我聽到真係如釋重負，好窩心。」他補充，方爸爸對Maple亦非常疼愛：「一家人食飯，我問阿爸想食乜，佢話：『你唔好問我，你問Maple食乜嘢！』」目前二人婚後暫住父母家，一家關係融洽。

（即時娛樂）