掌控自己人生｜Starman資本攻略

睇見霍諾德徒手攀完台北101條片，我第一個反應同你一樣：「痴線！條友係咪嫌命長？」

第二個反應，係望一望我份供緊嘅「全方位危疾保障計劃」月結單，供咗八年，claim 過零次。而原來呢條友，反而一份人壽保險都冇買。或者可能，根本就買唔到。

然後我忽然覺悟，原來我同霍諾德嘅分別，在於我畀錢人哋去管理我嘅恐懼，佢就親自將恐懼變成生產力。

霍諾德份人，根本係對「香港式人生規劃」嘅終極挑機。

我哋細個被灌輸，「讀好書、入大行、買納米樓、買保險、買年金」，將人生每個縫隙都用「保障」填到滴水不漏。

佢呢？十九歲老豆走咗，讀緊柏克萊大學（UC Berkeley）工程系都照輟學，揸住架老爺露營車，一住十年，食罐頭納豆，將生活成本撳到近乎零。

當你同我係到計緊「供樓利率對比回報率」，佢就計緊「手指摩擦力對比死亡率」。

你驚股市跌，佢驚粒石仔鬆，大家都係 risk management，只係佢計果樣，錯左真係會死人。

最抵死係，科學家掃過佢個腦，話佢個杏仁核（負責驚嗰忽）淡定過禪修大師。唔係唔識驚，而係佢將「驚」呢樣嘢，透過練一萬次，變成一堆可量化的數據。條裂縫闊幾多mm、嗰個抓握點仲有幾多日壽命、心跳過咗某個數就要停低深呼吸。

我哋交保費去買個安心幻覺，佢交汗水去買個「今日唔使死」的實證。邊個更理性？我開始懷疑自己。

講到錢，霍諾德更係一絕。

未紅時，住車仔，但時間同意志全部自己話事。

紅咗之後，收入四大嚿：Netflix直播分帳、The North Face代言、企業請佢講「點樣喺高危中保持冷靜」、同埋個慈善基金會，專門捐錢去未發展國家裝太陽能板。

即係話，佢一邊徒手爬緊九百米懸崖，一邊冷靜地將三成收入拎去救個地球。我哋呢？一邊供緊份人壽保險，一邊諗緊聽日股市升定跌，個地球熱到溶關我鬼事。保險經紀成日話：「人生無常，要規劃呀！」

霍諾德就用人生示範：最極致嘅規劃，就係接受無常係常態，然後將自己練到無常都殺你唔死。

佢唔買人壽保險，但成立基金會去保障更多人嘅能源未來。我哋買齊保險，但可能連隔離屋姓乜都唔知。邊個個「保障網」織得大啲？

香港人最叻係乜？係將人生輸入成一份excel表。由K1 portfolio到MPF投資組合，每個cell都要計到盡，唔可以有「#DIV/0!」嘅錯誤。

我哋笑霍諾德「搵命搏」，但忘記咗，佢架露營車裡嘅自願貧窮，比起我哋被按揭綁架嘅「富足」，呼吸可能更暢順。佢日練夜練的專注，比起我哋同時撳十個群組、追三隻新股、憂五個市場嘅「分散投資」，回報率可能更高。

我哋以為自己揸住人生，其實係人生揸住我哋；佢以為自己挑戰緊死神，其實係死神幫佢過濾晒所有噪音。

段片最後，霍諾德攀完101，企喺五百幾米高空望落去，塊面冇狂喜，只有一種「收工」嘅平靜。

然後鏡頭一轉，係佢返到屋企，攬住兩個女，教佢哋認石頭種類。

網上條最高like留言話：「佢一隻手抓住嚿石，一隻手抱住個女。我老公？話OT好累，連個女默書簿都冇氣簽。」

可能，呢個時代真正嘅冒險，唔係去爬一座冇繩嘅高樓。而係你敢唔敢承認：我哋用一生精力去搭建一個『唔會輸』嘅陷阱；而佢，早就接受『會死』的可能，反而活得比任何人更實在。
所以，下次個保險經紀再同你sell「百分百保障」，你可以笑笑口問佢：

「知唔知霍諾德點解唔買保險？唔係因為佢大膽，係因為佢計數計得比你盡。佢將所有保費，都投資咗落肌肉記憶同太陽能板度。而我哋？我哋只不過將保費，投資咗落一個『扮人生唔會失控』嘅大型集體安慰劑度。」

真正嘅安全感，從來唔係買齊保險後嗰份安心；

係當你企喺自己人生塊垂直崖壁前，好清楚知道，我而家抓住嘅呢一個點，就係全部。

而咁，已經夠晒。

Subscribe FORTUNE INSIGHT Telegram:
http://bit.ly/2M63TRO

Subscribe FORTUNE INSIGHT YouTube channel:
http://bit.ly/2FgJTen