[山旅行 Insight Mountain] 海外行山 參加當地登山團8大陷阱

要去海外登山，除左可以自己安排行程外，都可以報名參加當地嘅登山團，不過海外登山公司良莠不齊，一個唔小心好易中伏。

最近小編同友人傾到依個問題，同大家分享一下佢係國外登山時遇過嘅中伏事件:

1. 假成團

友人:「之前報名行 K2 大本營，當地登山公司本來話有十幾個人報名，係香港臨上機前佢先話其他人黎唔到，原因係鬼佬怕恐怖份子，要求我俾1人團團費，貴過原先傾好個價好多…之後我係 Lonely Planet Forum 發現有人同我 Case 差唔多。之後我用 Forum 威脅佢先肯妥協一個合理價錢。」

2. 人手安排不足

友人:「K2 大本營的登山公司雖然妥協一個較便宜的價錢，但最後用廚師當嚮導，行左一陣就要自己走先，早到去營地煮飯，我就一條友係條冰川上行。另外，後來大雪時佢根本毫無應急方案，聽到天氣惡劣嘅新聞佢仲驚過我，叫我自己 call 直升機救大家。」

3. 多人報名但拆散成多個一人團再共用人手

友人:「之前行非洲最高峰 Kilimajaro，同一間公司明明同一日有好多人出發，但佢唔會 Group 埋大家一齊行，等大家要俾多啲錢，但係又會共用工作人員，根本全部人 Share 同一個廚房同一個廚師，實際 serve 過我的只有一個嚮導、一個背夫、一個廚師，但俾貼士時又會無啦啦有第四第五人出現要你俾貼士。」

4. 膳食安排差

友人:「第一次去 EBC 時得我一個，個嚮導真係咩都有意無意慳住，飲食都唔會太豐富，到第二次去 EBC 時一隊人上山，又會叫一大壺水俾大家任飲，仲叫多個薯條俾大家 share。」

5. 交通上，遇突發情況要等候被安排

友人:「自己一個人去，尤其係內陸機，人地會因你係外國人，將你當人球踢黎踢去，之前去Lukla時班機延誤，難得有位都係俾團客優先，就算想自費夾直升機，一大班團客個價都低啲。」

6. 為賺錢趕頭趕命，安全性成疑

友人:「唔好以為有當地嚮導就咩都安全，例如好多大陸登山嚮導都係話之你死，行高海拔雪山唔一定會安排高度適應日，之前去雲南哈巴雪山，正常黎講多一日適應會比較好，但佢地為左快啲落山接下單生意，唔夠高度適應不特只，當地人只會想你快啲上驢仔，快啲上去食飯瞓覺，最後係山頂啲人因為高反嘔到七彩，同團有人行到要拖落山。」

7. 愈少人，愈易呃

友人:「之前去四川四姑娘，嚮導去到埡口先同我講無冰爪上唔到頂，如果有香港領隊帶路，首先唔會係不合適的季節上雪山，第二，即使要裝備，香港領隊會幫你 Double Check。而且香港領隊係佢地米飯班主，點敢呃佢。」

8. 落左山，You are alone

友人:「去得遠，當然想 stay behind 玩下其他野啦。如果你自己去完 Kilimajaro 你就 alone 架啦…  Safari 果啲你要自己再其佢地傾，又會面對返價錢同信譽問題，煩都煩死。」

資料圖片: 山旅行 Insight Mountain Facebook專頁 

Fitz 連結: https://fitz.hk/?p=95326

更多：
Fitz Facebook專頁
[世界名步道] 印加古道 Inca Trail[世界名步道] 歐洲聖雅各之路 Camino de Santiago[世界名步道] 環白朗峰步道 Tour du Mont Blanc, TMB[世界名步道] 蘇格蘭西部高地步道 The West Highland Way, WHW[世界名步道] 韓國濟州偶來 Jeju Olle[世界名步道] 澳洲塔斯曼尼亞陸上步道 Overland TrackFitz 行山 Hiking