草蜢新加坡開騷班蘭蛋糕收唔停 蔡一傑拋禮物歌迷意外「中頭獎」

草蜢今個月初飛到新加坡舉行巡迴演唱會。

草蜢今個月初飛到新加坡室內體育館舉行《RE: GRASSHOPPER 草蜢巡迴演唱會》。演唱會內全場五千八百位觀眾整晚跟着草蜢一起跳、一起唱，完騷後三子一起接受訪問，蔡一智說：「估唔到我哋一開場，第一粒音，全場已經好crazy咁跟住唱足三個鐘，無停過，真係好犀利，亦都俾到好大力量我哋。」旁邊的蔡一傑說：「上次嚟呢度開騷係17年嘅事，六年冇開演唱會，新加坡嘅歌迷盡興，我哋又開心。」蘇志威亦認同說：「有佢哋嘅掌聲、尖叫聲支持，今晚我哋出盡體力。」

草蜢三子除了掛念歌迷，亦掛念當地的美食，蔡一智說：「我哋開騷前拍咗條片放喺社交網站，因為講咗句掛住新加坡嘅美食，我哋由落機一刻，不停收到歌迷送嚟嘅美食，依家我間房，係有十幾個班蘭蛋糕，仲有海南雞飯。」提到今次演唱會最難忘事件，蔡一傑馬上面露尷尬表情，他說：「我哋有一個環節，要將禮物拋去觀眾席送俾歌迷，可能當時我戴住手套，拋嘅時候甩手，成袋禮物撞向歌迷塊面，嗰一刻，又好笑，又尷尬，我喺台上不斷同佢講對唔住，最慘係因為衝力太猛，份禮物撞完佢塊面，再向後彈去其他觀眾，中咗『頭獎』但最終攞唔到禮物。」

除了尷尬事件，新加坡歌迷的熱情，同樣令草蜢印象深刻，蔡一智說：「今晚歌迷玩嘅人浪，係可以媲美香港嘅觀眾，因為新加坡三面台，要U字型做人浪，難度高好多，佢哋係連續幾首慢歌無間斷玩人浪，真係要俾啲掌聲歌迷。」蔡一傑說：「今晚完晒encore，唱晒歌單裏面嘅歌，但啲歌迷唔捨得走，最後我哋三個要再上台，同大家謝幕，見多一面，講多次拜拜。」