SONY出車？Vision-S首款概念電動車亮相！裝設33個感測器 環迴音響視聽系統 打造全新駕駛娛樂體驗

提到 Sony，大家第一個諗到嘅係手機、相機、耳機定係遊戲主機？今年 SONY 除咗喺「CES 2020 美國消費性電子展」上公布咗 PS5 資料外，更放出一個超級震撼嘅消息，公開概念電動車「Vision-S」，一齊嚟睇下「Vision-S」有咩令人驚喜嘅地方。

Sony 於 CES 展出首款電動車嘅原型作品，官方命名為 Vision-S。從發布會得知，呢款產品係 Sony 團隊與 Bosch、Continental、NVIDIA 同 Qualcomm 等科技界巨頭合力打造嘅成果。

Vision-S 係一款四座位、配備雙 200kW 引擎嘅轎車，百公里加速只需約 4.8 秒，而且時速最高可達每小時 149 英里（約每小時 239 公里）。 雖然官方並冇公布太多數據，不過根據觀察，儀表板顯示電量為 86% 時，可行駛距離顯示為 284 英里，即約 454 公里，由此可以換算出滿電里程將超過 500 公里。

全車內外搭載 33 個鏡頭同感測器，主控係一個寬螢幕多功能顯示器，車內 360 度環繞音響同唔會斷線嘅行動通訊，除咗呢啲車上科技，車身底盤運用由供應商 Magna 提供、全新打造嘅電動車專用平台，此公司同時與 Tesla﹑BMW 合作，SONY 更透露此平台也可用於 SUV 上，換言之「Vision-S」亦可能會於未來推出 SUV 款式 。

電動車作為未來汽車嘅新趨勢，往往都會加入眾多科技元素，強烈科技感亦係吸引唔少車主入手嘅原因。「Vision-S」當然亦朝呢個方向設計，從介紹影片睇到，「Vision-S」主副駕有一個超長嘅螢幕，包括主駕正面嘅電子標板，提供駕駛資訊、路況同娛樂。

SONY 旗下嘅娛樂應該都唔洗多介紹啦， 除咗中控台廣闊嘅多功能螢幕以外，車內後座更設獨立顯示器，可以打機、睇片排解搭車時嘅無聊時光，乘客仲可以用呢個顯示器，顯示車外攝影機拍攝嘅畫面。 加上配備 360 Reality Audio 技術，提供 360 度音場嘅音樂，音樂以串流方式播放，以及內建於每個座位嘅揚聲器，用家可盡享各式各樣嘅視聽娛樂。 「Vision-S」 可能會成為擁有最齊全嘅娛樂系統嘅汽車，其他品牌車應該好難超越「Vision-S」嘅娛樂性能。

而規格方面，佢搭載 33 個鏡頭同感測器，Sony 導入稱為 Time-of-Flight嘅科技，運用車內鏡頭同感測器，偵測車內人體同物品，呢啲資訊將會用嚟優化車內人機互動，例如手勢控制，同時亦能提升行車安全與舒適度。

其中包括支援 HDR 嘅高解析度 CMOS 影像傳感器（用於路面、物體偵測、色彩識別）、固態 LiDAR（日間、夜間視覺同物體探測）同 ToF 感測器（用於辨別車內外人、物同部分車載娛樂功能）組合埋一齊，可以全面感知車廂內外嘅事物，提升自動駕駛效能同安全性。Sony 將呢套方案統稱為「安全繭」（Safety Cocoon Concept），寓意佢能夠為車輛提供 360 度全面保護。

至於 Vision-S 嘅自駕等級，目前只有 Level 2。意味車輛可以完全控制加速、煞車同方向，但呢一切都必須要喺有人監督嘅前提之下。

睇到呢度大家可能都好心急想知「Vision-S」幾時會推出。可惜 SONY 目前冇將「Vision-S」投入正式生產嘅計劃內，只係作為概念車向公眾展示。不過，SONY 見到「CES 2020」中眾多參與者對「Vision-S」嘅興趣時，加速將「Vision-S」投放到量產名單上亦唔出奇，大家一齊期待呢部電動車推出市面與 Tesla﹑Porsche Taycan競爭嘅一日啦。