林盛斌回應長女再被惡意侮辱　「律師話可能構成違法行為」

TVB藝員林盛斌（Bob）養有三女一子，17歲長女林霏兒（Faye）早前在社交平台發文，表示遭網民留言性騷擾，自覺不快便截圖公開其對話內容，並以黑底紅字怒斥對方：「骯髒過份」。今日（10月24日）Bob在社交平台分享一張帖文截圖，有個名為「Kenny Tse」的網民，在threads分享林霏兒的照片，寫道：「咁嘅樣都食得落，邊位仁兄咁樣為民除害，香港政府應該要頒個大紫荊勳章俾佢」，並標註「林盛斌」。

林盛斌發文分享該張截圖，並發長文回應：「有時網絡世界嘅嘢，係有啲恐怖嘅，有個律師朋友話俾我知，其實網上寫呢啲嘢，已經可能構成兩至三個違法嘅行為。Kenny，我相信我唔認識你，你亦都唔認識我，我唔知道你出呢個post嘅意圖係乜嘢，可能你係想蹭吓個熱度，蹭吓個流量？定係想侮辱吓我嘅屋企人，希望令到佢哋唔開心？如果係咁嘅話，好遺憾要同你講聲，你呢個唔係太有善意嘅企圖，應該好難成功。」

Bob直言一家因網民的頭像而笑得好開心：「尋晚我將你呢個post俾咗我啲屋企人睇，佢哋完全冇任何嘅感覺，大家姐仲話你揀呢張相幾靚添，所以唔好意思，令你失望，我個仔仲問我，點解你個樣係一支紅酒同埋一件蛋糕，跟住我哋一家人就笑得好開心。我想講，我同我嘅屋企人，包括我太太同啲小朋友，都比你想像中勇敢、堅強、正面、有胸襟、有自信。」

Bob勸告該名網民「己所不欲，勿施於人」：「可能你出呢個post嘅時候會覺得好好玩，好得意，又或者想得到其他人嘅認同令到你嘅感覺良好啲，我估我呢個post應該令你感覺到你會多返啲存在感。我見到你話想搵個地方寫吓嘢，識吓人，你呢個想法係好好嘅，我亦都非常支持，但係如果係要寫呢啲嘢去引人注意，你都要諗吓你吸引返嚟嘅，會係啲咩人。我相信你都聽過一句說話：己所不欲，勿施於人。你諗吓，如果我將你阿媽個樣post出嚟，然後寫返類似你寫嘅字，你嘅感覺係點呢？佢嘅感覺又會係點呢？又或者唔係你阿媽，係你嘅女朋友，或者好朋友，佢哋又會有咩感受呢？認真嘅，我真係好想你好好諗吓。」

最後Bob反問「Kenny，你驚咩呀？」，寫道：「我絕對唔係聖人，我都試過講錯嘢，亦都試過做錯事，我仍然努力學習去改進同改善中，慢慢去認知乜嘢係啱，乜嘢係唔啱，你呢個post嘅內容，確實，真係有啲唔係咁好。其實，真係冇要求過要你特別去愛我哋，但係又有冇需要專登去攻擊同傷害呢？你可能對我或者對我嘅屋企人有意見，不過，我仍然衷心祝福你有開心同愉快嘅生活。要話返俾你聽，最後我都有答返我個仔個問題嘅，我同佢講：『可能呢個哥哥好驚俾人見到佢個真樣，所以佢咪唔放自己個頭像上去囉，你見佢之前出嘅所有嘢都冇佢個樣㗎，咁佢就可以喺個網絡上面寫好多嘢，啲人都唔知佢係邊個，好似寫乜都得咁囉。』跟住佢話：『吓，佢驚咩呀？』係囉，Kenny，你驚咩呀？」。