周奕瑋報復式旅遊增值 陳美齡教譚嘉儀擺甫士

周奕瑋報復式去旅行！

陳美齡、周奕瑋、譚嘉儀、周吉佩、龍婷、顏志恒、Dez 余宗遙、梁凱晴、孔徳賢、李思雅等今日出席《萬眾同心公益金》 記者會，繼年初頒獎典禮後周奕瑋再次為大騷任司儀，雖然與無綫已經不再是「親生仔」關係，但無礙佢搵真銀，工作如接踵而來，依然獲無綫重用，「今次除咗我仲有森美同陳貝兒做主持，我都只係後輩學吓嘢，雖然唔係經理人合約期，但工作模式係無變，自己做大騷只有兩年左右經驗，好開心公司都不斷俾機會我，另外我亦都有接出面嘅工作，通關後多咗出埠機會，早前與旅行社合作，自己好耐無去日本旅行，可能都未必俾到大家最新資料，所以我都要報復式旅遊一下，自我增值先可以再介紹俾觀眾。」

兩位一樣咁靚！

陳美齡當晚除了唱《香港香港》外，亦被安排與譚嘉儀合唱，她笑言教對方台上擺甫士，「當晚我會同嘉儀合唱《珍珠淚》，但未知邊個唱邊part，因為仲未開始排，有少少緊張，我平時唱歌好鍾意邊唱邊做手勢同擺甫士，依家隔離多咗個人都唔知點擺，可能我會教下佢擺甫士，到時可能喺台上一齊擺甫士唱！」