港男加薪4成轉新工 第一日返工卻驚見「翻天巨變」 急急求教網友應唔應該辭職

年尾流流，唔少打工仔都會搵工跳槽，轉新工當然追求加人工，但就算有人工加，都唔保證唔會中伏。有港男近日轉新工，人工較之前獲得明顯加幅，理應「飲得杯落」，豈料返工第一日就遇上一個「不得了」的情況，令他萌生去意，急急上網向網友討教：我應唔應該辭職？

撰文：Yin｜圖片來源：LIHKG討論區、ViuTV劇集《大叔的愛》劇照

這位港男打工仔日前在LIHKG討論區分享返新工的經歷，新公司係一間小型公司，就算加埋老闆和港男自己，都只得5個人，即係有一個直屬上司和兩個跟港男同級的同事。

港男返新工 上司同事竟然同日Last Day

公司雖然細，但港男一朝早返到公司，感覺一切正常，到中午仲同上司和兩名同事一齊食Welcome Lunch，期間有講有笑，氣氛融洽。之後返到公司，上司就向港男交代接下來的工作，對港男未來有咩期望等等。

直到下午4點幾，事情開始變得詭異。上司竟然同港男講，今日係港男第一日返工之餘，亦係上司和其餘兩位同事的Last Day，還囑咐港男以後要好好加油。

上司的講法意味，公司原本3名打工仔都會一齊離職，只剩作為公司新人的港男和老闆，相信任何人聽見都會嚇一跳。港男在驚訝之餘，亦急忙問上司，係咪公司有啲咩問題？

上司就話公司財務正常，他和兩名同事離職都係個人原因，而且老闆係個好人，特別叮囑港男要好好珍惜依份工。

港男無端端變「最後生還者」 心想要唔要辭職

話雖如此，但港男從第二日開始就成為公司唯一受僱員工，難免會令人心荒荒，甚至萌生去意；他亦擔心就算留下繼續做，都可能留唔到好多時間，是否應該快點搵過另一份工。

不過，港男也提到，單計人工，新工較之前份工一下子多了40%，從2萬港元跳升至2.8萬港元，確實有其吸引之處。

網友笑說港男返一日工就變第二把交椅

港男的不平凡遭遇分享到討論區後，隨即引發網友熱議。不少網友都笑稱，港男返了一日工，已經變成了「老屎忽」，係公司第二把交椅。還有網友打趣說，第日可能到老闆都辭職，這時候公司就會係港男所有。

估計港男上司同事跳槽 但老闆挽留失敗

有網友估計這種詭異情況的成因，可能係3個人過檔其他公司，或者另起爐灶，只係老闆畀唔起錢挽留。但細公司肯大幅加薪請人，相信係預咗港男將要一個人頂幾個人的工作量。更加有網友話，試過做港男上司的這種角色，留到最後就係為公司請人頂替自己。

網友鼓勵港男艱難情況才易上位

不過，部分網友相對正面看待情況，認為在艱難情況才更容易上位；有人則半開玩笑講，可以趁公司無人之際，「跳草裙舞」遭老闆再加人工。