窩心女友必讀Marvel電影懶人包 入場前熟讀尙氣/永恆族/蜘蛛俠3最後指南

各位女朋友請注意！如果對Marvel電影嘅認識仲係停留喺大大隻嘅美國隊長或者超有錢嘅Iron Man，咁你就要補吓習喇! 事關自從無限之戰之後，美隊同Iron Man因為老化同戰死，已經唔會再出現喺嚟緊嘅新電影，而接住落嚟將會係Marvels宇宙嘅新支線！想同BB有偈傾就要睇吓小編為你度身定造嘅懶人包喇～

圖片來源： 網絡圖片 ｜撰文：Debbie

1.《尙氣與十環幫傳奇》 （上映日期： 2021年9月2號）

《尙氣與十環幫傳奇》係Marvel第一套講述亞裔超級英雄嘅電影，故事講尚氣自幼接受父親文武鐵血戰鬥培訓，精通各種武術招式。為咗逃離家鄉，改名換姓展開新生活，直到過去再度搵上門… 究竟尚氣會唔會發掘到十環的無敵力量，擺脫父親嘅勢力呢？

尙氣與十環幫傳奇啱啱喺香港上映，但似乎外界對部戲嘅期待值都相當兩極。有部分就好期侍我哋嘅香港代表梁朝偉，仲有好耐冇出現喺螢幕前嘅陳法拉同元華！另外有部分就認為主角嘅選角太差，顏值唔討好之外，劇情亦唔算吸引，就睇吓上映之後嘅反應又會係點啦！

2. 《永恆族》（上映日期：  2021年11月18號）

天神族創造咗具有超級能力嘅外星種族-永恆族、以及擁有變形能力、基因不穩定嘅外星種族-變異族，當中永恆族喺地球上已經秘密生活咗超過7000年。電影嘅主體故事發生於《復仇者聯盟4：無限之戰》事件之後，永恆族對於凡人發生嘅種種戰爭同災害，都考慮應唔應該干涉同幫助，而喺呢個問題上，唔同嘅永恆族成員都有各自嘅睇法…

(圖片來源：網絡圖片)

《永恆族》預告片一出，外界都一致好評話非常期待！除咗有國民大叔馬東石飾演Gilgamesh - 宇宙最強壯的永恆族之外，仲有女神安祖蓮娜祖莉化身Thena戰士嘅演出，兩個角色仲會有好多互動戲份添！

3. 《蜘蛛俠3：不戰無歸》（上映日期：  2021年12月待定）

故事承接《蜘蛛俠：決戰千里》的事件之後，蜘蛛俠嘅真實身份被Mysterio公開，日常生活同聲譽都大受影響，為咗改變現況，Peter向奇異博士尋求幫助，試圖利用魔法令世界上所有人都忘記佢係蜘蛛俠，念咒途中，因為Peter嘅猶疑而令到所有嘢都趨向異常…

(圖片來源：網絡圖片)

新系列電影入面我諗大家最有認識嘅都係呢一套，由蛛蛛仔Tom Holland主演嘅第三套獨立電影《蜘蛛俠3：不戰無歸》。而故事發展亦到去到一個非常有趣嘅局面，有消息指因為劇情會穿梭唔同時空，所以三代蛛蛛俠同堂嘅可能性好大！今次電影嘅大反派亦係初代蜘蛛俠曾經交過手嘅八爪魚博士，演員仲搵嚟初代飾演過八爪魚博士嘅Alfredo Molina！唔少人都話童年回憶返晒嚟呀。

睇完懶人包之後係咪清楚咗好多呢？記得Share埋俾你身邊啲姊妹睇，入戲院就唔使左問右問啦！