林芊妤宣布佗女︰屋企終於有粉紅色嘢

林芊妤（Coffee）今年5月宣布再懷孕，一度疑因胎兒有問題而擔心得哭成淚人，最後接受檢查後證實胎兒一切正常，放下心頭大石。下月預產期的她日前（21日）趁36歲生日在酒店開派對，一次過「Birthday staycation + Baby Shower + Gender reveal」。她與丈夫在派對上揭曉今胎佗女，湊成一個「好」字。影片中，Coffee難掩喜悅，一時興奮大叫「我屋企終於有粉紅色嘢喇」，轉頭又感動落淚。

Coffee說︰「我好早，3個月嘅時候已經知道係女仔，但當時因為做咗驗血報告，知道佢可能會有事，所以當時我更加唔開心，因為我渴望生女，渴望咗好耐好耐…… 當時嗰種患得患失，唔係知道係女仔，然後冇咗個BB呀嘛？有啲嘢，我覺得都係命運嘅安排。多謝你哋呢班契媽，因為所有人、喺網上留言、鼓勵我同關心我嘅人，我都稱你哋為呢個女嘅契媽。因為有你哋，佢先至會咁幸運，因為有你哋嘅祝福。喺呢9個月，我每次出街，都會有好多人過嚟同我講加油同恭喜，或者畀我一個好親切嘅笑容。我覺得好有愛同好幸福。」此時，Coffee又想落淚，她續說︰「你睇吓，我又想喊，黐線㗎，有BB真係會特別眼淺。不過，我真係太感動，所以多謝你哋﹗」

（即時娛樂）