魯振順離巢無綫去向曝光　自爆冇工開原因竟同宣萱有關

前無綫資深綠葉魯振順今年4月曾公開控訴被cut騷影響收入，早前親認已經離巢，結束27年賓主關係。近日他亮相網台「異騷show」節目《潮流King》，接受莫家淦、吳雲甫及潘梓峰等人訪問，大爆更多內幕，指原來曾被安排拍《巨塔之后》，卻因為臨時易角改劇本連累角色被刪，但檔期依然被Hold起而未能接拍其他劇集，導致冇工開：「我收過入組信，但遲遲唔開戲，一直冇人答到我，原來改咗劇本，張可頤冇演變咗宣萱，劇本轉咗我個角色就冇咗，但劇組一早攞咗我個檔期，其他監製冇得用我，《巨塔》又冇第2個角色畀番我做，結果就咁不了了之。」

而講到不續約內情，他無奈表示也非自行選擇：「唔係我話簽就簽，其實我講咗都知道唔會再續約，所以個合約好靜悄悄就完成咗，冇人搵我傾咪就完咗。」他笑指曾公然與公司對抗，擔心就算獲簽約也不會有好待遇，又指發生事件後獲不少好友幫助給予工作機會，現時於家燕媽媽藝術中心教小朋友做戲。

東網網站 : https://on.cc/東網Facebook專頁 : https://www.facebook.com/onccnews/