Tyson Yoshi遭獨立歌手指控3大罪狀 Ig發文反駁

獨立Hip Hop歌手ProdiG前晚（2日）在Ig限時動態出片，直接點名diss（羞辱）Tyson Yoshi（程浚彥），背景音樂歌詞句句挑機，包括「我話想要晒所有錢住喺複式要埋你部車」、「咪再懶Hip-Hop//只係一隻跟風狗//蛇鼠一窩得個樣//冇乜家教，學吓禮儀先」。向來性格直率的Tyson未有公開反擊，ProdiG昨天又在限時動態發出背景音樂是Tyson《Growing Up》的影片，他說︰「呢首就係當初我幫你填詞作曲寫嘅第一首廣東話歌，之後你為自己利益，將兩個人嘅歌出個solo版本，仲諗埋啲古仔呃你班fans話係幫啲癌症小朋友寫嘅歌。」

他同時指若Tyson的粉絲想繼續信這些故事，他沒所謂，自己只是表達想講的。他直言唔鍾意Tyson Yoshi咁假，斥對方利用自己的身份同價值去同PR講唔想見到某啲artist，壓榨其他artists。ProdiG最後打上2020年《Growing Up》第一個demo的歌詞「如發覺你總是不幸，別嫌棄，還在說快樂過生活，太無理。天試過塌下來，風吹起，葉泛黃。當初天真的你，你已忘記。」

Tyson隨後在限時動態公開他受邀探訪癌症粉絲的合照及訊息，發文回應ProdiG的指控。他說︰「唉﹗1. 當年《Growing up》我係留空首歌嘅第2段邀請佢參與，但係佢寫出嚟嘅旋律歌詞，並未達到我心目中嘅要求，所以最後我決定自己完成作品並且發布。2. 所講緊嘅係《If I Die Tonight》嘅故事，並唔係《Growing up》，我從來唔攞人命開玩笑，個小朋友已經走咗，請你尊重。3. 小弟沒有咁嘅膽量亦都冇咁嘅權力去阻止任何人參與活動，小弟參與活動只有一個目的就係賺錢。有客戶用我已經好感恩，何德何能控制品牌或者活動公關用人準則。」Tyson又分享年前的演出片段，他在其中一條影片裏哽咽地說︰「我其實一路做緊自己音樂，冇諗過原來會成為一個別人臨走前想見嘅人。」

ProdiG在限時動態轉發一位網民的截圖，該網民表示︰「呢單嘢我都想講好耐@prodig，下一個story係話TY利用自己嘅身份去打壓，跟住話唔想見到某啲人，而呢一個亦都係我唔想再睇TY嘅原因…… 因為大佬Tiab真係少咗好多Brand嘅活動，上年都唔覺，但係今年完全發現擺到明就係bully。」ProdiG再說︰「你咁醒～你自己做咗啲咩，你自己心知肚明啦，仲要你哋班護主狗幫佢畫公仔畫出腸咩。你哋慳番啖氣睇佢點樣之後又喺度點樣扮冇事，講到自己幾無辜，你哋鍾意睇嗰啲用粗口包裝係真誠嘅，咪繼續欣賞呢個故仔囉。喂，唔好講啦，呢啲圈外人同埋佢啲fans會收埋扮睇唔到，唔想其他人知㗎～蒙在鼓裏以為自己好醒，做好自己咪算囉，你係咪唔想喺呢個圈搵錢呀？」

（即時娛樂）