周吉佩廣州音樂會反應佳　下站進軍加拿大

「中年好聲音」周吉佩（吉吉）日前於廣州增城舉行音樂會，此乃他首次在廣州開騷，全程又唱又跳，辣㷫全場。吉吉先以《Para Para Sakura》揭開序幕，期間出動泡泡槍射向台下觀眾，及後再連續唱出多首經典金曲包括《夏日寒風》、《我恨我痴心》及《餓狼傳說》等。今次他邀來好兄弟顏志恒及魏嘉信作特別嘉賓，3子合唱一曲《燕尾蝶》更引發氣氛沸騰。

席間他們又感性對話，吉吉表示：「魏嘉信平時只報喜不憂，希望你唔好咩都唔講。顏志恒就成日唔瞓覺，好擔心你身體。」之後他眼濕濕續謂：「魏嘉信，你係我朋友中接近最好嘅一批，你嘅好係一個字形容得晒，就係真！唔好成日怕唔好意思，有心事一定要搵我哋傾，出面人未必明，但我哋一定明！」再轉向顏志恒：「同你嘅相識可以話係相逢恨晚，我哋3個之中最感性嘅係你，最表達嘅係你，對唔住我成日缺席大家嘅聚會，有時如果唔係你嘅主動，大家未必成日會見或保持到聯絡，不過我唔會變㗎，要辛苦你繼續維繫大家感情。」

而繼香港、澳門及廣州的音樂會後，吉吉9月底將出發前往加拿大登台。至於即將到來的暑假，他則希望先與家人留守廣州數天吃喝玩樂一番，從繁忙工作中稍稍釋放出來充電。

東網網站 : https://on.cc/東網Facebook專頁 : https://www.facebook.com/onccnews/