雲浩影首開個唱感動落淚 吊帶短裙配黑絲跳辣身舞

雲浩影（Cloud）一連兩場《Finding Cloud雲浩影演唱會2025》昨晚（3日）落幕，兩場騷獲不少圈中好友捧場，包括音樂人男友T-Ma、馮允謙、黃淑蔓、張天穎、吳林峰，還有家人及老闆林建岳等。演唱會由「小小Cloud」給長大後自己的一封信開始，雖然她不知道未來如何，但堅信世界是善良和美麗。身穿淡綠色長裙的Cloud仙氣登場，以鋼琴自彈自唱《Moon River》，然後又演唱出道作《願望之翼》。她說：「我好多謝音樂令我認識大家，而我由細到大唔多朋友，可能性格比較『摺』，未試過搞生日會，但今日第一次有呢個party同大家一齊去玩，好開心！」

Cloud一口氣演唱《無以名狀的痛》、《慢性分手》、《到了那裏就對吧》和《自發性神經反應》等歌曲。她接着換上吊帶短裙配黑絲演唱《I Love You 3000》，與男舞蹈員跳辣身舞，全場哄動。她對觀眾說：「係咪好正呢？係咪比噚晚更加正呢？因為今晚爹哋無嚟睇！」第一晚演唱會，Cloud唱《你在我不遠處》時因現場歌迷的手機星海感動落淚，她昨晚唱到這首歌時笑說：「今晚我唔會喊啦，你哋咪試吓囉！」不過她唱到最後一首歌《別畏高》時仍忍不住熱淚盈眶及說：「我唔捨得你哋，可唔可以下次再見呀？」

Cloud騷後表示：「兩晚帶畀我嘅感覺好唔同，包括我個人狀態同觀眾反應，第一晚好似同大家開party，尤其是當我自彈自唱《Singalongsong》時，大家反應好熱烈。而我好用力唱慢歌時，觀眾亦好投入。」談到以3封給自己的信連繫整個演唱會，她說：「我冇寫日記習慣，但想喺第一個演唱會用文字寫啲嘢畀自己。我會諗，到底以前嘅自己，諗到我依家開騷會唔會好自豪、好驕傲呢？所以就代替以前嘅自己，寫信畀依家嘅自己。」

兩晚完成演唱會後，Cloud都與手持VIP票的觀眾合照。她說：「我知道自己台上表現仲有好多進步空間。好開心完成咗兩場演唱會，亦好開心見到台下觀眾，每一張開心臉孔。合照時每一位同我講鼓勵嘅說話，甚至有人話第一次睇嘅演唱會就畀咗我啦。呢啲對於我都係好珍貴嘅時刻。電影《香港四徑大步走》裏面有分『完成者』和『生還者』，我覺得我依家係『生還者』，向『完成者』努力，希望將來更多機會和實戰經驗，到時會有『雲浩影3.0』送畀大家。」

（即時娛樂）