連詩雅笑丈夫陳家樂性格老派︰佢嘅浪漫係令我放心

連詩雅（Shiga）接受商台《星光背後》訪問，分享與丈夫陳家樂由交往、求婚到結婚生女的甜蜜經過。曾在情路上經歷不少波折的她表示與家樂修成正果，是因為「適當嘅時候遇上適當嘅人」。

Shiga說當初伙拍陳家樂到韓國拍攝《12個夏天》，大家身邊各有伴侶，因此沒想太多，直至翌年獲對方邀請現身網上節目《三夫當關》，彼此均回復單身才開始約會。談及陳家樂最初吸引她的原因，Shiga說：「純品，有咁上下樣貌嘅男仔多數係花花公子，但佢反差好大，好old school style。佢係夜晚要聽收音機瞓，朝早飲茶睇報紙嗰啲。佢日日可以食同一款男人飯，同我最初想像嗰啲男人好唔同。佢仲有種傻氣，我欣賞佢嘅傻氣，畀到我穩定，同佢一齊好有安全感。」Shiga表示家樂的浪漫就是令她放心︰「對於我，就係好浪漫。例如佢去邊，佢會自動自覺話『我到喇，我做緊乜呀』。我從來無話要check住佢，但係佢好願意分享畀我聽，我就覺得好浪漫。」

Shiga表示與家樂拍拖兩年時，因疫情分隔兩地3個月，卻令她感到對方能付託終生。Shiga說：「我超級討厭Long D，但疫情最嚴重嘅時候，我要返內地拍劇3個月。但嗰3個月，佢令我完全放心，嗰時我哋靠facetime見，佢會特登約我拍完劇各自返到屋企，一齊打開facetime食飯，臨瞓又開住facetime揀一套戲一齊睇。真心覺得佢唔使做呢啲嘢，但係咁，佢就令我好安心。佢知我係一個缺乏安全感嘅人，佢就畀呢樣嘢我，而佢咁有耐性做呢件事，就令我諗到佢係一個可以結婚嘅對象。」

兩人婚後不足一年成功懷孕，Shiga坦言是計劃亦是意外︰「係想有小朋友，所以無特別避孕，但無諗過咁快咁順利！」Shiga表示其生理期一向不準，大懵至懷孕兩個多月才醒覺要驗孕。她說︰「最初仲以為感冒頭暈，係兩個幾月先試吓驗。發現真嘅時候，好surprise。」她透露家樂得悉自己要當爸爸時，不如外間想像般激動。Shiga回憶︰「嗰日佢放工返嚟，我嗰刻好開心又有好多情緒，佢一開門我就爆喊，佢即刻問我：『乜事？做乜事？』我喊住話：『你做爸爸啦！』佢好冷靜話：『咁咪好囉！我哋係想有小朋友嘛。』或者當時太突然，佢冇太大感受，係隔咗幾日佢陪我去產檢，當佢睇到個mon，再聽到BB『噗噗』嘅心跳聲，佢就流眼淚，我哋兩個都一齊流眼淚。」

Shiga不諱言首胎就是想生女，至於老公，她說：「以前佢想生仔，想同囝囝一齊做運動。但因為我哋屋企有一對狗狗係一仔一女，佢好嗲個女，就話有個女都係好sweet。」至於這麼快收身復出又演舞台劇又唱歌，Shiga直言仍想於事業上再衝刺。至於復出是否代表暫沒計劃追多個，她說：「我自己隨緣，老公係想，佢想有個囝囝，佢成日講笑話：『唔生啦，除非下一個係仔啦！』但唔係你plan就有，真係隨緣，我依家係學識去感受同活在當下。」

（即時娛樂）