反送中警察記者會十大金句！鐳射槍都只係得第二？

紀律部隊金句王──警察

「反送中」運動到依家，警察們已經製造左好多金句，例如「唔好搞我後面」呢一句，已經比網民不斷咁引用。而警隊依家每日下午四點召開嘅記者招待會當中，仲持續增加緊更多金句㗎！你知唔知目前為止，記招入面嘅警察金句有邊幾句？邊一句又最多網民引用？等DailyView逐個話你知啦！

DV小教室：網路溫度計透過《KEYPO大數據關鍵引擎》大調查觀測咗近萬個網站頻道（而且不斷增加ing），包括港澳地區的新聞頻道、FB、IG同埋各大討論區、Blog……透過強大嘅網文爬梳觀測，攞到巨大嘅資料樣本數，拎到上億嘅文章及留言訊息，以人工智慧的語意程式做分析。

「警方別無他法」（322筆）

喺記者招待會入面，記者經常會問到警方每個執法行為嘅依據喺邊？例如8月25日有警員用腳踢示威者等鎮壓行為，警方喺記招入面就以「警方別無他法」作為回應。其實警察喺回應港鐵葵芳站施放催淚彈嘅時候，都係用呢個理由嚟回應記者提問㗎。有網民就指出，大家企出嚟上街遊行，其實都係別無他法嘅選擇嚟！

image source:i-CABLE新聞影片截圖

「我唔係專家」（377筆）

記者經常就催淚彈過期等事件提問警方，警方發言人就會以「我唔係專家」作為回覆，有網民就將呢句套落去日常生活，學生比歷史老師問問題問到口啞啞，唔識回答之際，講一句「我唔係專家」就搞惦；啊媽問你點解屋企WiFi上唔到網？唔好問我啦！我都唔係專家！問我都無用㗎！

image source:香港01新聞影片截圖

「使用最低武力」（1048筆）

反送中抗爭運動期間，警隊前前後後出動左好多鎮壓武器，例如水砲車、催淚彈、胡椒噴霧、布袋彈，而喺警方記者招待會當中，警方發言人就指出，警隊係「使用最低武力」嚟嘗試鎮壓騷動，並無過度使用武力。網民杜先生就喺instagram問到，嗰位爆眼少女唔通係見到你班警察眼冤，所以自己插盲自己？

image source:Youtube: 政府新聞處 Information Services Department, HKSARG

「不完美，可接受，要改善」（1211筆）

警方發言人喺回應警方行為嘅時候，曾經講過警方做法係「不完美，可接受，要改善」，呢個金句簡直係一絕！網路上流傳一張圖，如果日後女朋友問點解同女仔出街？你就可以回答：「做法不完美，但可接受，要改善」，而當老闆問你點解番工遲到，你都係可以用呢句金句嚟回答老細㗎！

image source:Facebook: 香港警察 Hong Kong Police影片截圖

「39分鐘」（1479筆）

喺警方回應7月21日元朗事件嘅記者招待會上面，警方發言人反駁記者「八個字先去到現場」嘅提問，指出其實警方係用左「39分鐘」去到現場。眾多網民就提出疑問，「39分鐘」同「八個字」好似都只係相差左一分鐘咋喎！另外就有網民講到，應該警方都係一分鐘幾千萬上落嘅人嚟，佢哋嘅一分鐘係好寶貴㗎！

image source:Facebook: 香港警察 Hong Kong Police影片截圖

「用腳推開」（1525筆）

有新聞片段拍攝到一名警方用腳踢開一名示威者落地，警方發言人反映呢名警務人員只係「用腳推開」示威者。眾多具有良好中文水平嘅網民就指出呢套說詞嘅奇怪之處：「踢」係足部，而「推」係手部，點解會用「腳」嚟到「推」示威者？網民戲稱警方應該係中文唔係太好，中文嘅博大精深係蘊藏好多意義㗎！

image source:Youtube: 香港大紀元新唐人聯合新聞頻道影片截圖

「喬裝成不同人物」（5347筆）

面對記者發問警務人員是否曾經喬裝成示威者，警方發言人則承認喺示威現場係有警員喬裝成不同人物，眾多市民都質疑呢種「喬裝」，如何確保唔會違法？而另一邊，有想像力嘅網民就引用左子華神嘅一句名言「如果你落左妝我唔認得你就叫喬裝」，以後一有動漫展cosplay活動，大家齊齊喬裝上陣啦！

image source:星島日報新聞影片截圖

「我手頭上無資料」（5707筆）

面對眾多記者提問，警方發言人都係盡量回答社會上嘅疑問，但係好多時候唔知道係因為問題太過專業，定係事發時間太過緊急，好多時警方發言人會以「我手頭上無資料」為理由回答記者提問，網民就話，連警方發言人都無資料喺手，咁應該係事件太難交代，連公關稿都寫唔出嚟，警方自然無資料喺手啦。

image source:Youtube：Now News影片截圖

「鐳射槍」（12344筆）

香港浸會大學學生會會長因為身上帶有鐳射筆被警方拘捕，警方指出呢個屬「鐳射槍」，拘捕理由係「藏有攻擊性武器」，警方仲係記者招待會親身演示雷射槍嘅傷害能力。網民見到之後紛紛表態，近距離連續攻擊的確係有一定嘅殺傷力，如果對方企定定接受連番攻擊，唔洗鐳射筆，竹籤都係可以致命㗎！

▲網民以多支鐳射筆照射報紙，諷刺警方「鐳射槍」嘅講法。

image source:

「er」（22487筆）

喺記者招待會當中，上至一哥盧偉聰，眾多警方發言人係思考點樣回應嘅時候，「er」就變成左佢哋嘅口頭禪，講起警方記招嘅金句，大家就會第一時間諗到「er」呢個詞，而更加有警方被網民冠上「er er sir」嘅稱號，網上面連「er er sir」嘅歌仔都有埋添！呢個金句真係深入民心，無疑係警方金句第一名！

▲網民剪輯警方記者會片段，二次創作歌曲《學sir叫》。

image source:

分析說明：

本研究資料由《KEYPO大數據關鍵引擎》提供，分析時間範圍為2019年06月08日至2019年08月30日。

網路大數據系統觀測港澳地區上萬個網站頻道，包括新聞頻道、Facebook、Instagram及各大討論區、BLOG等，針對討論『警察記者會』相關文本進行分析，並根據網友就該議題之討論，作為本分析依據。

本文分析之結果，非參考投票、民調、網路問卷等資料，名次僅代表網路討論聲量大小，不代表網友正負評價。